Séra Hilda María Sigurðardóttir hefur verið ráðin prestur við Stykkishólmsprestakall en greint er frá þessu í tilkynningu frá Þjóðkirkjunni.

Samkvæmt henni tilheyra sex sóknir prestakallinu. Þær eru: Stykkishólmssókn, Helgafellssókn, Breiðabólstaðarsókn, Bjarnarhafnarsókn, Flateyjarsókn og Narfeyrarsókn.

Séra Hilda tekur við starfinu af séra Gunnari Eiríki Haukssyni. 

„Hilda María fæddist árið 1999. Hún ólst upp á Ísafirði og lauk grunnskóla- og stúdentsprófi þaðan. Hún hóf nám við Guðfræði- og trúarbragðafræðideild Háskóla Íslands 2019 og útskrifaðist með b.a. próf í guðfræði vorið 2022 og mag.theol próf vorið 2025.

Samhliða námi starfaði hún í barna- og æskulýðsstarfi í Neskirkju, Fossvogsprestakalli og Grafarvogskirkju. Einnig hefur hún starfað á hjúkrunarheimili og í félagslegri heimaþjónustu,“ segir í tilkyningunni.