Undanfarnar vikur hefur Samstöðin haldið út í þættinum Óþekkti þingmaðurinn og er þættinum ætlað að kynna almenningi fyrir nýjum þingmönnum landsins sem voru kosnir á Alþingi síðasta vetur.

Björn Þorláksson, stjórnandi þáttarins, tilkynnti fyrr í dag að gestur næsta þáttar yrði Snorri Másson, þingmaður Miðflokksins, en hann hefur látið mikið fyrir sér fara á undanförnum árum í þjóðfélagsumræðunni.

Sólveig Anna Jónsdóttir, formaður Eflingar, hefur þegar tjáð sig um viðtalið þrátt fyrir að það hafi ekki verið birt. Hún hóf umræðu í Rauða þræðinum á Facebook en sá vettvangur er ætlaður fyrir stuðningsmenn Sósíalistaflokksins til að skiptast á skoðunum.

„Aldeilis! Samstöðin, sjónvarp Sósíalistaflokks Íslands, tekur viðtal við Snorra Másson eins og ekkert sé. Nú verður áhugavert að sjá meðlimi forystusveitar flokksins, sem stendur jú fyrst og fremst fyrir mannúð og gegn and-woke-istum, stíga fram og gagnrýna harkalega að Samstöðin sé notuð til að breiða út boðskap Snorra. Þar hlýtur að vera á ferðinni mikið prinsipp- og tabú-brot sem benda þarf á með áberandi hætti,“ en Sólveig sagði sig úr Sósíalistaflokknum fyrir stuttu síðan en mikil fjárhagslegtengsl eru milli flokksins og Samstöðvarinnar.

„Eftir að ég rang-hugsaði upphátt á Samstöðinni var ég af framvarðasveit flokksins m.a. ásökuð um stuðning við öfgahægrið, að vera haldinn white saviour complex, vera TERF, að traðka á jaðarsettum hópum, eyðileggja baráttu vinnuaflsins og hata hinsegin fólk.

Það getur varla verið að þeir högrökku bardaga-einstaklingar sem "kölluðu mig út" með svo staðföstum hætti ætli sér að þegja yfir því að peningar flokksins fari í taka viðtal við svona agalegan mann,“ skrifaði hún að lokum.

„Allt nú þegar orðið brjálað vegna viðtals sem þó er ekki búið að sýna!“ skrifaði Björn Þorláksson um færslu Sólveigar en viðtalið við Snorra verður sýnt í kvöld.