Eftirleikur atviks sem tengdist Tourette-heilkennis-aðgerðarsinnanum John Davidson á BAFTA-verðlaunahátíðinni í gær heldur áfram, eftir að fjöldi þekktra einstaklinga í kvikmyndaiðnaðinum lýsti yfir mikilli óánægju með framkomuna og viðbrögðin í kjölfarið.
Davidson var viðstaddur athöfnina þar sem kvikmyndin I Swear, sem er byggð á lífi hans og reynslu af fordómum tengdum Tourette-heilkenninu, var tilnefnd til nokkurra verðlauna. Á meðan verðlaunaafhendingin stóð yfir heyrðust ítrekað hróp frá honum úr salnum, þar á meðal niðrandi orðalag, n-orðið, á sama tíma og leikararnir Delroy Lindo og Michael B. Jordan voru á sviðinu við afhendingu fyrstu verðlauna kvöldsins.
Viðbrögðin létu ekki á sér standa. Jamie Foxx skrifaði undir færslu um atvikið á samfélagsmiðlum og sagði: „Óásættanlegt“ og bætti við: „Nei, hann meinti þetta kjaftæði“.
Blaðakonan Jemele Hill gagnrýndi einnig málið harðlega og skrifaði: „Svart fólk á bara að sætta sig við að vera vanvirt og afmennskað svo að öðrum líði ekki illa.“
Þá sagði leikarinn Wendell Pierce: „Það er mjög pirrandi að fyrsta viðbragðið hafi ekki verið skýrar og einlægari afsakanir til Delroy Lindo og Michael B. Jordan. Móðgunin gagnvart þeim er í forgangi. Skýringar á orðalaginu skipta ekki máli.“
Kynnir BAFTA-verðlaunanna, Alan Cumming, greip tvisvar sinnum inn í athöfnina og útskýrði stöðuna fyrir áhorfendum. Hann sagði meðal annars: „Tourette-heilkenni er fötlun, og kækirnir sem þið hafið heyrt í kvöld eru ósjálfráðir, sem þýðir að sá sem er með Tourette-heilkenni hefur enga stjórn á orðavali sínu. Við biðjumst afsökunar ef einhver móðgaðist í kvöld.“
Framleiðsluhönnuður myndarinnar Sinners, Hannah Beachler, greindi frá því á samfélagsmiðlum að henni hefði einnig verið beint að niðrandi orðalagi og gagnrýndi hún það sem hún kallaði yfirborðskennda afsökunarbeiðni. Hún skrifaði: „Það sem gerði ástandið verra var afsökunin í lokin, „ef einhver móðgaðist“.“
Að lokum gaf BBC út yfirlýsingu þar sem beðist var afsökunar á atvikinu. Þar sagði meðal annars: „Sumir áhorfendur gætu hafa heyrt gróft og móðgandi orðalag á BAFTA-verðlaununum 2026. Þetta stafaði af ósjálfráðum munnlegum kækum tengdum Tourette-heilkenninu og var ekki viljandi. Við biðjumst afsökunar á þeim óþægindum sem þetta kann að hafa valdið.“
Tourette-heilkenni er taugaröskun sem einkennist af ósjálfráðum hreyfi- og raddkækjum. Um 10–20 prósent þeirra sem eru með sjúkdóminn upplifa svokallaða koprólalíu, þar sem ósjálfrátt blótsyrði eða niðrandi orð koma fram.
