Flutningar forstöðumanna sendiskrifstofa í utanríkisþjónustunni standa nú fyrir dyrum. Um er að ræða reglubundna flutninga sem jafnan eru ákveðnir að hausti en tilkynntir þegar samþykki gistiríkja liggja fyrir.

Í tilkynningu frá utanríkisþjónustunni segir að eftirtaldir flutningar muni taka formlega gildi á næstunni:

Stefán Haukur Jóhannesson, sendiherra, flyst frá sendiráði Íslands í Tókýó í embætti sendiherra Íslands í Brussel og gagnvart Evrópusambandinu frá 1. ágúst næstkomandi.

Þá tekur Gréta Gunnarsdóttir, sendiherra, við sem fastafulltrúi Íslands hjá Evrópuráðinu í Strassborg frá 1. september næstkomandi en hún tekur við af Ragnhildi Arnljótsdóttur, fastafulltrúa sem flyst til starfa í utanríkisráðuneytið.

María Mjöll Jónsdóttir, sendiherra og skrifstofustjóri, flyst frá ráðuneytinu í embætti sendiherra og fastafulltrúa Íslands í París frá 1. ágúst næstkomandi, en hún tekur við af Unni Orradóttur, sendiherra, sem flyst til starfa í ráðuneytið.

Að lokum er það Hreinn Pálsson, sendiherra og mannauðsstjóri, sem flyst frá ráðuneytinu í embætti sendiherra Íslands í Tókýó frá 15. júlí næstkomandi.