Stórsöngkonan Björk Guðmundsdóttir virðist hafa tekið þátt í tónlistarsniðgöngu gegn Ísrael, en verk hennar urðu óaðgengileg Ísraelum í gegnum tvær helstu streymisþjónustur um helgina, að því er ísraelskir fjölmiðlar greindu frá í gær.

Flest lög og myndbönd söngkonunnar og lagahöfundarins voru ekki aðgengileg notendum í Ísrael á Spotify og Apple Music á sunnudag, en hlustendur erlendis sögðust enn geta nálgast þau.

Lög og myndbönd hennar voru hins vegar áfram aðgengileg á opinberu YouTube-rás hennar og á Bandcamp þjónustunni.

Björk, sem áður hefur sýnt stuðning við Palestínumenn, hefur ekki gefið formlega yfirlýsingu um að hún hafi fjarlægt tónlist sína frá streymisþjónustum í Ísrael. Hins vegar virðist þetta skref samræmast aðgerðum hundruða annarra listamanna sem hafa gengið til liðs við samtökin „No Music for Genocide“, sem kalla eftir menningarlegri sniðgöngu gegn Ísrael vegna þjóðarmorðsins á Gaza.

Fréttin kom skömmu eftir að breska trip-hop hljómsveitin Massive Attack tilkynnti á fimmtudag að hún væri að ganga til liðs við samtökin, sem eru byggð á fyrirmynd „Film Workers for Palestine“, sem hefur krafist svipaðrar sniðgöngu í kvikmyndaiðnaðinum.

„No Music for Genocide“ er aðeins eitt dæmi um vaxandi alþjóðlegt átak gegn Ísrael á menningar- og íþróttasviðum vegna þjóðarmorðsins á Gaza. Samtökin veita listamönnum leiðbeiningar um hvernig hægt sé að geo-blokka lög sín svo þau verði óaðgengileg á streymisþjónustum í Ísrael.