Söngkonan Sara Pétursdóttir, betur þekkt sem Glowie, og maki hennar Guðlaugur Andri Eyþórsson, klippari og ljósmyndari, hafa sett til sölu þriggja herbergja íbúð sína í vistvænu íbúðahverfi í Gufunesi. Söluverð er 53.412.464 kr.
Um er að ræða 55,4 fermetra íbúð á annarri hæð í Jöfursbás 11E, íbúð 203, í húsi sem nefnist Sif. Húsið er hluti af byggð Þorpsins vistfélags, þar sem reist hafa verið Svansvottaðar íbúðir með áherslu á hagkvæmni, grænar lausnir og sjálfbært umhverfi fyrir ungt fólk.
Íbúðin skiptist í forstofu, tvö svefnherbergi, opið eldhús og stofu, auk baðherbergis með tengi fyrir þvottavél og þurrkara. Úr stofu er útgengi á svalir sem snúa í suðvestur og njóta góðrar birtu. Eldhúsið er í opnu rými með innréttingu sem nær upp í loft og spanhelluborði, en svefnherbergin eru bæði með fataskápum og parketi á gólfi.
Sérstaða eignarinnar felst meðal annars í þeim kvöðum sem fylgja byggðinni. Kaupendur þurfa að vera á aldrinum 18 til 40 ára og hámarks söluverð eignarinnar fylgir vísitölu innan hverfisins, sem þýðir að ekki er heimilt að yfirbjóða ásett verð. Þá eru gæludýr velkomin í Jöfursbás.
Byggðin í Jöfursbási samanstendur af 137 íbúðum í fimm húsum, á þremur til fimm hæðum, sem raðað er um miðlægt torg og garðrými. Hönnun leggur áherslu á góða rýmisnýtingu, skjólgóð útisvæði og algilda hönnun þar sem aðgengi allra er tryggt. Frá svæðinu er útsýni yfir Geldinganes og Viðey, auk þess sem göngu- og hjólastígar liggja meðfram strandlengjunni og tengja hverfið við Grafarvog.
Íbúðarhúsin eru verksmiðjuframleidd úr forsteyptum einingum og byggð með það að markmiði að tryggja gæði, endingu og vistvænar lausnir. Í tengslum við byggðina eru einnig matjurtagarðar á landi Reykjavíkurborgar sem íbúar geta nýtt til ræktunar.
Deiliskipulag Gufuness byggir á verðlaunatillögu hollensku arkitektastofanna jvantspijker og Felixx, sem unnu alþjóðlega hugmyndasamkeppni árið 2016. Þar er Gufunes lýst sem „ventli“ fyrir ungt fólk sem sækist eftir borgarbrag, grósku og samfélagslegri nálgun frekar en hefðbundnum úthverfum.
