Tugir Íslendinga eru með skráð lögheimili sitt í Ísrael en ekki neinn býr í Palestínu en þetta kemur fram í svari Þjóðskrá við fyrirspurn Mannlífs um málið.

Í svarinu kemur fram að 25 íslenskir ríkisborgarar eru með skráða búsetu í Ísrael í dag og hefur fjöldi Íslendinga þar í landi aldrei farið niður fyrir 20 undanfarin tíu ár. Lægsti fjöldi Íslendinga þar í landi á síðustu tíu árum er 23 en það var á árunum 2019-2021. Athygli vekur að fjöldi Íslendinga hefur lítið breyst í kjölfar árásar Hamas þann 7. október 2023 en Ísrael hefur svarað fyrir sig með þjóðarmorði og hafa tugir þúsunda látist síðan þá.

Það er hins vegar ekki neinn Íslendingur skráður með lögheimili sitt í Palestínu en þrír Íslendingar áttu heima þar árin 2022 og 2023.

Mannlíf sendi fyrirspurn á utanríkisráðuneytið til að spyrjast fyrir um samskipti þess við íslenska ríkisborgara í Ísrael.

„Utanríkisráðuneytið hefur verið í sambandi við íslenska ríkisborgara búsetta í Ísrael, en ekki er hægt að veita frekari upplýsingar um einstök mál,“ sagði Ægir Þór Eysteinsson, fjölmiðlafulltrúi utanríkisráðuneytisins, við fyrirspurn Mannlífs.