Miðlæg rann­sókn­ar­deild lög­regl­unn­ar á höfuðborg­ar­svæðinu hefur óskað eftir því að gæsluvarðhaldi yfir Margréti Höllu Hansdóttur Löf, sem grunuð er um að hafa verið valdur að dauða föður síns, Hans Löf, verði framlengt en mbl.is greinir frá þessu.

Ævar Pálmi Pálma­son, aðstoðar­yf­ir­lög­regluþjónn hjá lög­regl­unni á höfuðborg­ar­svæðinu, segir við miðilinn að rannsókn málsins sé á lokametrum en Margrét átti að losna úr gæsluvarðhaldi í dag.

Samkvæmt heimildum Heimildarinnar hefur hún játað að hafa beitt foreldra sína ofbeldi en neitar því að hafa myrt föður sinn og segist ekki hafa verið nærri honum þegar hann hneig niður á heimili þeirra í Súlunesi í Garðabæ. Dánarorsök liggur ekki fyrir en rannsókn stendur ennþá yfir, og er eins áður segir alveg að ljúka.

Uppfært:

Gæsluvarðhaldið yfir Margréti hefur aftur verið framlengt um fjórar vikur, eða til 1. júlí, á grundvelli almannahagsmuna, samkvæmt tilkynningu lögreglunnar.