Útvarpsmaðurinn Svali Kaldalóns hefur unað hag sínum vel á íslandi eftir að hann flutti aftur til landsins ásamt fjölskyldu sinni vegna COVID-19. Hann fær hins vegar ítrekað spurningar um hvort og hvenær fjölskyldan hyggst flytja aftur til Tenerife.
„Já, ég og við ætlum út aftur, en bara get ekki svarað hvenær vegna ástandsins í veröldinni. Þetta er svarið við spurningunni sem ég hef fengið aftur og aftur síðustu vikurnar,“ segir útvarpsmaðurinn og fararstjórinn Sigvaldi Kaldalóns, eða Svali eins og er gjarnan kallaður í daglegu tali.
Svali og fjölskylda hans bjuggu á Tenerife í rúm tvö ár en fluttu til Íslands í vor þegar kórónuveirufaraldurinn brast á. Fjölskyldan áformaði að flytja aftur til Kanaríeyjunnar, þar sem Svali og Jóhanna Katrín Guðnadóttir, eiginkona hans reka fyrirtækið Tenerife-ferðir, og var planið að fara út í upphafi september. Svali segir að eitthvað hikst sé á þeim áformum og ljóst að þau Jóhanna þurfi að setja strákana sína í skóla hér heima og taka svo stöðuna þegar líður á veturinn. Fjölskyldan þurfi líka að finna sér íbúð.
Margir uggandi yfir komandi vetri
Svali segir ennfremur að nóg sé um að vera hjá fjölskyldunni, auk þess sem þau Jóhann séu bæði komin með vinnu. „Í vetur mun Jóhanna vinna áfram í Unique hár og spa, hárgreiðslustofunni þar sem hún hefur lengst af unnið, en ég verð síðan á Bylgjunni alla föstudaga milli 13 og 16 með mínum gömlu félögum í Zúúber. Zúúber var morgunþáttur sem rúllaði í 6 ár snemma á þessari öld. En það góða við þá vinnu er að ég get auðveldlega sent út frá Tenerife þegar ég svo loks kemst þangað,“ segir hann og bætir við að fjölskyldan sé einmitt staðráðin að fara út aftur og halda rekstri fyrirtækisins áfram.
„Þetta er svarið við spurningunni sem ég hef fengið aftur og aftur síðustu vikurnar.“
„Eins og staðan er nú þegar þetta er skrifað, getur í rauninni enginn sagt hvenær allt verður farið í gang þar ytra. Í hreinskilni sagt, þá held ég að það muni taka langan tíma þangað til þetta verður allt eins og það var. Staðan í dag er þannig að a.m.k 30 % allra veitingastaða á eyjunni munu ekki opna aftur, margar verslanir farnar á hausinn og fjölmörg afþreyingar fyrirtæki standa mjög illa,“ lýsir Svali og segir marga uggandi yfir komandi vetri sem alla jafna ætti að vera þétt bókaður því þá sé háanna tími á Tenerife og Gran Canary.
Ný tækifæri
„En þetta er ekki alslæmt og það er margt jákvætt sem á eftir að koma út úr þessu á Tenerife svo að því sé til haga haldið. Það verður gríðarleg hreinsun og ljóst að þau fyrirtæki sem stóðu illa fyrir, verða ekki til staðar þegar um hægist. Þá opnast vonandi tækifæri fyrir nýja aðila sem geta gert hlutina enn betur. Ferðaþjónustan mun ekki taka gestum sem sjálfsögðum hlut og margt er það sem mun breytast til hins betra.“
Svali segir að annars sé margt í fæðingu hjá Tenerifeferðum en aðeins of snemmt fyrir hann að segja frá því að svo stöddu. „Góðir hlutir gerast hægt. Við horfum nefnilega björtum augum fram á veginn.“
Þetta kemur fram í nýjustu færslu Svala á Facebook.
Athugasemdir