Sú var tíðin að Egill Helgason fjölmiðlamaður og Björn Ingi Hrafnsson, fyrrverandi fjölmiðlakóngur, elduðu saman silfur grátt. Egill taldi Björn Inga á sínum tíma vera einhvern versta frammámann þjóðarinnar og lýsti honum sem slíkum. Þegar skomyndateiknarinn Henry Þór Baldursson lenti með teikningar sínar undir eignarhaldi Björns Inga sendi Egill harðorðan póst þar sem hann skildi ekki hvernig Henry gæti verið í samtarfi sem slíku.
„… Skil reyndar ekkert i þér að vera í félagi með einum gerspilltasta stjórnmála-fjölmiðlamanni Íslands,“ skrifaði Egill í tölvupósti til skopmyndateiknarans. Seinna gerðist Egill launþegi Björns Inga á Eyjunni með Silfur Egils.
Nú er öldin önnur og Egill hefur skipt um skoðun og veitt Birni Inga uppreist æru. Þetta þykir sumpart vera til dæmis um tilkomið umburðarlyndi Egils sem kunnur var af dómhörku. Þetta gerist í samhengi við bók Björns Inga um Covid 19 sem Egill gefur háa einkunn og mærir sinn gamla vinnuveitanda fyrir spurningar á Covidfundum. Ekki eru þó allir sama sinnis því Björn Ingi stendur í ströngu eftir hrun fjölmiðlaveldis síns.
„Mér hefur fundist Björn Ingi Hrafnsson eiga stórleik í farsóttinni. Hann hefur sett sig vel inn í málin, verið óþreytandi að leita upplýsinga, reynir að greina það sem gerist bak við tjöldin. Almennt hefur verið dálítill skortur á því hjá fjölmiðlunum hér …,“ skrifar Egill á Facebook og lætur í ljósi að sjálfur hafi hann lagt til greinarkorn í bókina og nú stefnir í að Björn Ingi þurfi að skrifa annað bindi …
Athugasemdir