Það fór mjög fyrir brjóst Samherjamanna þegar blaðamaður Stundarinnar, Alma Mjöll Ólafsdóttir, mætti í höfuðvígi félagsins á Akureyri til að spyrja heimafólk spurninga um skoðun þess á meintum mútum félagsins í Namibíu. Rætt var við fjölda manns á áhrifasvæði Samherja sem leggur árlega hundruðir milljóna króna til góðra mála í héraðinu. Meðal þeirra sem svöruðu voru María Björk Ingvadóttir sjónvarpsstjóri og Karl Eskil Pálsson, fyrrverandi fréttamaður Ríkisútvarpsins, og núverandi þáttastjórnandi á sjónvarpsstöðinni N 4 sem Samherji hefur skipt mikið við og keypt dagskrárefni. Karl svaraði spurningum blaðamannsins í sjónvarpsupptöku en gaf ekkert upp um skoðun sína á rannsókninni eða umfjöllun sinna gömlu félaga. Hann lagði þó lykkju á leið sína til að pota í Helga Seljan, fréttamann Kveiks, og nefna að hann hefði sent óbirta frétt í Seðlabankann. Sagðist Karl Eskil aldrei á sínum ferli hjá RÚV hafa sent óbirtar fréttir til þeirra sem um var fjallað. Hann sagðist hafa skrifað hundruð frétta um Samherja án þess að þeir reyndu að hafa áhrif. Sjónvarpsstjórinn, María Björk, vildi heldur ekkert segja um Namibíumálið og varðist frétta rétt eins og lögregluforingi á upplýsingafundi. Það var greinilegt hvar hjörtu þeirra slógu …
Athugasemdir