Shakira hefur rofið þögnina eftir að fyrrverandi eiginmaður hennar, fótboltakappinn Gerard Pique, opinberaði samband sitt með hinni tuttugu og þriggja ára Clöru Chia Marti. Shakira og Pique skildu í júní á síðasta ári eftir 12 ára samband en saman eiga þau tvö börn. Í nýju viðtali sagðist hún vera orðin sterkari eftir sambandslitin sem tóku mikið á hana andlega. „Mér finnst ég vera fullkomin núna vegna þess að ég stóla bara á mig sjálfa,‘‘ sagði söngkonan.
Sögusagnir um framhjáhald eiginmanns hennar komu upp á yfirborðið á síðasta ári. Í kjölfarið samdi hún lag sem slúðurmiðlar vilja meina að sé um nýju konuna í lífi Pique. „Það er staður í helvíti sem er frátekinn fyrir konur sem styðja ekki aðrar konur,“ sagði Shakira aðspurð um nýja smellinn. Þá sagðist hún alltaf hafa haft þann draum að eiga fjölskyldu þar sem börnin áttu mömmu og pabba undir sama þaki.
„Þú uppfyllir ekki alla drauma þína í lífinu en lífið hefur þann hátt á að bæta þér það og ég held að lífið hafi vissulega gert það með yndislegum tveimur börnum sem ég á. Þau fylla mig af ást á hverjum degi.‘‘ Shakira bætti því við að hún hefði alltaf verið „tilfinningalega háð karlmönnum“ en nú væri hún „nóg ein“.
Athugasemdir