Þau stórtíðindi að Samfylking er langstærstti flokkur landsins eftir eyðimerkurgöngu undanfarinna ára valda mörgum hrolli. Kristrún Frostadóttir formaður halar inn rúmlega 24 prósent fylgi, samkvæmt könnun Gallups á meðan Sjálfstæðisflokkurinn mælist með rúmlega 20 prósent.
Sjálfstæðisflokkurinn glímir bersýnilega við fylgisfall vegna Bjarna Benediktssonar formanns sem dröslar á eftir sér fortíð sem er í besta falli vafasöm. Salan á Íslandsbanka og Leyndarhvolsmálið eru hvorutveggja erfið Bjarna. Niðurstaðan úr formannsslagnum við Guðlaug Þór Þórðarson leiddi í ljós að Bjarni er gríðarlega umdeildur innan flokks. Sjálfstæðismenn hafa gjarnan sett formann sinn næstan almættinu en nú er öldin önnur. Þá bætist við syndalista Bjarna að glutra fylginu niður fyrir höfuðfjandann, Samfylkingu.
Hin stórtíðindin í könnuninni eru þau að Vinstri grænir eru við það að þurrkast út. Flokkurinn mælist með sex prósenta fylgi eða sambærilegt og Sósíalistar sem hirða af þeim fylgi hinna róttæku. Skrímsladeild Sjálfstæðisflokksins veittist að Kristrúnu fyrir seinustu kosningar og gerði hlutabréfakaup hennar tortryggileg með hjálp Moggans. Hópurinn mun á næstunni leggja upp í herferð og reyna að sparka fótunum undan Kristrúnu áður en fylgið festist í þessum hæðum. Vandinn er aðeins sá að í fortíð hennar er lítið að hafa sem hægt er að nota sem fallbyssufóður fyrir rógberana …
Athugasemdir