Eitt af furðulegri málum síðari tíma snýst um listamanninn, Odee, Odd Eystein Friðriksson, sem hannaði og birti nýja heimasíðu með afsökunarbeiðni Samherja hf. vegna Namibíumálsins. Þorsteini Má Baldvinssyni, forstjóra Samherja, sárnaði óskaplega, enda ekki annarra að biðjast afsökunar á afglöpum eða meintum brotum fyrirtækisins. „Eins og ykkur er eflaust kunnugt um, hefur falsfréttum í nafni Samherja verið dreift að undanförnu …,“ eru upphafsorðin í bréfi Þorsteins Más til starfsfólks síns. Samherji hefur í hótunum við listmanninn og hyggst láta taka síðuna niður og verja meintan heiður sinn.
Sjálfur hefur listamaðurinn gengist við að hafa gert umrædda heimasíðu sem listgjörning. Hið skondna við málið er að Samherji hefur áður beðist afsökunar á hluta málsins í auglýsingum sínum. Odee hefur útskýrt sína hlið og sagði í samtali við Heimildina í gær að það ætti „að taka lyklana að Samherja og afhenda þá Namibíumönnum á núll einni, það á bara að gefa þeim þetta fyrirtæki.“ Það er ekkert gefið eftir á þeim bænum.
Spurning hvort Þorsteinn Már taki ekki að sér að biðjast afsökunar á listamanninum sem baðst afsökunar á meintum afbrotum Samherjamanna …
Athugasemdir