Þeir sem vilja taka við af Bjarna Benediktssyni sem formaður Sjálfstæðisflokksins eru óðum að setja sig í stellingar. Flokkurinn er í erfiðri stöðu með eitt minnsta fylgi sem hann hefur haft í sögu sinni. Yfir honum trónir himinhár skuggi Samfylkingar Kristrúnar Frostadóttur með fylgi um þriðjungs landsmanna.
Vitað er að Guðlaugur Þór Þórðarson umhverfisráðherra er tilbúinn að taka við flokknum þegar kallið kemur. Hann naut stuðnings um 40 prósent landsmanna þegar hann skoraði formanninn á hólm. Flokkseigendafélag Sjálfstæðisflokksins vill hann aftur á móti ekki. Á þeim bænum er fullur vilji til þess að sú settlega Þórdís Kolbrún Reykfjörð Gylfadóttir varaformaður taki við formennskunni. Það hefur flogið fyrir að Bjarni muni hætta fyrir landsfund til að hún fái embættið án kosningar.
En svo er það þriðji kosturinn, Áslaug Arna Sigurbjörnsdóttir, ráðherra háskóla og vísinda. Áslaug var lengi vel kennd við hvítvín og humar en hefur síðan þroskast og eflst sem stjórnmálamaður. Hún hefur fullan vilja til þess að verða formaður. Nýjasta útspil hennar var í gær á fundi með fólki úr sjávarútveginum. Þar stillti hún Svandísi Svavarsdóttur sjávarútvegsráðherra upp með skemmtilega ósvífnum hætti sem helsta vandamáli atvinnugreinarinnar. Skilaboðin á bak við risastórt fokkmerkið eru klár. VG er ekki lengur samstarfshæft og það þarf að taka af skarið. Áslaug hefur tekið sér stöðu og slagur hennar og Þórdísar Kolbrúnar mun hjálpa Guðlaugi Þór …
Athugasemdir