Allt annar bragur er á framkomu forsætisráðherra eftir að Bjarni Benediktsson tók við embættinu. Katrín var bæði í blíðu og stríðu kurteis við andstæðinga jafnt og samherja. Hún var laus við átakasækni og sumpart of samvinnulipur.
Vakin er athygli á því í þingsal að Bjarni eftirmaður situr glottandi undir ræðum stjórnarandstöðunnar og á það til að leika sér í símanum með tilheyrandi andlitsgeiflum þegar andstæðingar tala. Logi Einarsson, þingmaður Samfylkingar, vakti athygli á þessum ósóma forsætisráðherrans. Bjarni brást illa við og lýsti skömm sinni á málflutningnum.
Forsætisráðherrann nýi er að sögn átakasækinn og kjaftfor í samskiptum og lætur engan eiga neitt inni hjá sér. Hann hikar ekki við að lítillækka andstæðinga sína. Vandinn er hins vegar sá að í þessu embætti þarf að sitja mannasættir líkt og gerðist með Katrínu sem fórnaði að vísu flestum prinsippum fyrir hinn innri frið í ríkisstjórninni og endaði svo með að fórna forystu og fylgi Vinstri-grænna. Það þarf nánast kraftaverk til þess að ríkisstjórn Bjarna lifi af sumarið og haustið …
Athugasemdir