Brynjar Níelsson skellti sér á hátíð lögfræðinga um helgina með eiginkonunni.
„Við Soffía ákváðum gærkvöldi að bregða undir okkur betri fætinum og fara á árlega hátíð lögfræðinga. Nú bar svo við að vegna efnaskiptasjúkdóms, sem hefur hrjáð mig undanfarin ár, komst ég hvorki í nokkur jakkaföt né fínni skyrtur. Eina sem passaði enn voru dansskórnir. Nú voru góð ráð dýr. Valið stóð um að fara í snjáðum gallabuxum og slitnum bol eða í múslimaserknum sem okkar maður á Spáni hafði skilið eftir heima hjá mér. Ákvað að fara í gallabuxunum til að vera ekki sakaður um menningarnám.“ Þannig hefst Facebook-færsla Brynjars Níelssonar, fyrrum alþingismanns og mannréttindafrömuðar en Soffía er gælunafn hans fyrir eiginkonuna Arnfríði Einarsdóttur. Segir Brynjar að þau hjónin hafi verið lang elst á hátíðinni.
„Á hátíðinni voru sennilega um fimm hundruð lögfræðingar og mikið af stórglæsilegu ungu fólki. Við Soffía vorum lang elst og gátum eiginlega bara dansað vangadans undir háværri rokktónlist. Þarna voru nokkur af helstu stórmennum þjóðarinnar, ráðherrar, þingmenn og útvarpsstjórinn. Fór vel á með okkur útvarpsstjóranum og hann var tilbúinn að athuga hvort ekki væri hægt að finna fyrir mig djobb innan RÚV.“
Að lokum segir Brynjar frá því að hann hafi deilt borði með Þórhildi Sunnu Ævarsdóttur Pírata og að veislustjórinn hafi gert of mikið grín að honum.
„Ég var á borði með Þórhildi Sunnu ásamt fleirum. Upphaflega stóð til að við Þórhildur Sunna yrðum á tveggja manna borði með kertaljósi úti horni svo við gætum átt rómantíska stund saman, en úr því varð ekki, því miður. En þetta var ánægjustund fyrir okkur Soffíu, sem erum mikið til hætt að fara út á meðal fólks. Mér fannst þó veislustjórinn gera fullmikið grín á minn kostnað og ég treysti því að hann verði ekki ráðinn aftur.“
Athugasemdir