Einar Kárason rithöfundur er einn af mestu töffurum eldri kynslóðarinnar á Íslandi. Hann á að baki glæstan feril þar sem Djöflaeyjan rís hæst. En undir harðneskjulegu yfirbragðinu leynist lítið, viðkvæmt blóm. Þetta brýst gjarnan fram þegar upplýst er um rithöfundalaun ríkisins þar sem Einar hefur ekki notið náðar undanfarin ár eftir að hafa verið á beit í þeim allsnægtagarði um árabil.
Nú síðast var það Kvikmyndasjóður sem fékk töffarann til að virkja grátstafinn í kverkum sér. Tilefnið er að Friðrik Þór Friðriksson leikstjóri fékk þá flugu í höfuðið að gera handrit eftir nýlegri bók Einars og sótti um styrk.
„Tveir opinberir „ráðgjafar“ hafa nú vegið og metið umsóknina, og báðir hafnað henni. Hvorugur er reyndar þekktur af merkilegum framlögum á sviði kvikmynda,“ skrifar Einar á Facebook og tilgreinir að ráðgjafarnir hafi ekki nennt að lesa umrædda bók sem þó sé aðeins 120 blaðsíður.
„Andverðaleikasamfélag“ kom upp í huga Einars við þessa sáru höfnun sem bætist ofan á aðrar raunir hans. Víst er að margur vorkennir skáldinu vegna hrakfaranna …
Athugasemdir