Líklegt er talið að landsfundi Sjálfstæðisflokksins verði frestað fram á haust en fundurinn átti að fara fram í lok febrúar. Innanbúðarmenn flokksins hvísla sín á milli að sú frestun sé vegna þess að Bjarni Benediktsson, tilvonandi fyrrverandi formaður flokksins, vilji gera allt til að koma í veg fyrir að Guðlaugur Þór Þórðarson verði næsti formaður.
Guðlaugur, sem bauð sig eins og margir muna gegn Bjarna árið 2022 og fékk 40% atkvæða, er sagður vonast eftir því að Áslaug Arna Sigurbjörnsdóttir og Þórdís Kolbrún Reykfjörð Gylfadóttir bjóði sig báðar fram til formanns. Slíkt myndi þjóna honum vel því þær höfði báðar til sama hóps innan flokksins meðan stuðningsmönnum hans myndi ekki detta í hug að kjósa einhvern annan en Guðlaug væri hann í framboði.
Sagt er að forsætisráðherrann fyrrverandi liggi nú með höfuðið í bleyti að reyna leysa úr flækjunni í flokknum. Þá hafa sumir innan flokksins nefnt Halldór Benjamín Þorbergsson, fyrrverandi framkvæmdastjóra Samtaka atvinnulífsins, og Ásdísi Kristjánsdóttur, bæjarstjóra í Kópavogi, sem mögulega arftaka Bjarna. Ljóst er að pólitískir andstæðingar flokksins myndu taka þeim fagnandi enda ekki líkleg til stórra afreka þegar sviðsljósið er á þeim ef miðað er við fyrri störf og verk …
Athugasemdir