Einhverjir biðu þess spenntir að heyra á Sprengisandi á Bylgjunni um ákvörðun Guðlaugs Þórs Þórðarsonar alþingismanns varðandi formannsframboð í Sjálfstæðisflokknum.
Í kynningu á komu Guðlaugs í þáttinn var gefið í skyn að nú yrði ákvörðun hans opinberuð. Viðtalið reyndis vera hið besta drottingarviðtal þar sem Gulli og Kristján Kristjánsson spyrill fóru um víðan völl og greindu stöðu Sjálfstæðisflokksins í frumeindir. Þeir voru sammála um að flokkurinn hefði undir stjórn Bjarna Benediktssonar misst jarðsambandið og því færi víðs að hann væri lengur flokkur allra stétta.
Í bláendann á viðtalinu kom svo loks spurningin um það hvort Guðlaugur ætlaði sér að fara í framboð. Svarið var að hann hefði ekkert ákveðið. Aftur á móti tilkynnti Áslaug Arna Sigurbjörnsdóttir við húsfylli og lúðraþyt að hún tæki slaginn. Áslaug Arna er fædd með silfurskeið í munni, rétt eins og Bjarni Benediktsson. Hún lagði áherslu á að flokkurinn næði ekki lengur til allra stétta en nefndi dæmi í ræðu sinni um að hún þekkti venjulegt fólk og kynni að meta það.
Líkur á framboði Guðlaugs Þórs eru ekki miklar en hermt er að margir innan flokksins vilji fá hann til að leiða Sjálfstæðisflokkinn í Reykjavík og freista þess að rjúfa þá eymd sem þar ríkir …
Athugasemdir