Ferðamálastjóri, Arnar Már Ólafsson, segist ekki vera hrifinn af lokunum eða bönnum við náttúruperlur á Íslandi. Hann telur að málið sé að stýra aðgengi á náttúrustöðum betur og jafnframt auka fræðslu.
Upplýsingar og góð fræðsla sé lykillinn að öryggi við náttúruperlur segir hann.
Ferðamálastofa, lögreglan á Suðurlandi, sveitarfélag Bláskógabyggðar, landeigendur og björgunarsveitir skoða þessi misserin öryggismál við Brúará eftir að erlendur ferðamaður féll í ánna og drukknaði, og er þetta ekki í fyrsta sinn sem erlendur ferðamaður lætur lífið við Brúará:
„Ég er almennt ekki hrifinn af lokunum og bönnum eða að stúka svæði af og koma í veg fyrir að gestir geti skoðað það. Betra er að veita upplýsingar og góða fræðslu þannig að fólk átti sig á hættunum,“ segir Arnar Már í samtali við RÚV og hann telur mikilvægt sé að hafa merkingar áberandi og á mörgum tungumálum við fjölsótta náttúrustaði, enda þurfi að huga aðgengi:
„Til dæmis að aðgengi sé skipulagt þannig að það lágmarki hættu, að það séu stígar, hugsanlega einhverjar afmarkanir þannig að fólk fari ekki yfir ákveðin mörk, en við vitum það samt að ef að einn ferðamaður fer á stað sem að getur verið varasamur þá koma hinir oft í kjölfarið,“ segir Arnar Már og er spurður að því hvort það séu aðallega erlendir ferðamenn sem átti sig ekki á hættunni.
„Já ég held ég geti nú sagt það en Íslendingar átta sig ekki alltaf á því hvar hættur leynast, það er ekki hægt að útiloka það, en ég held að þetta séu fyrst og fremst erlendir ferðamenn,“ segir Arnar Már.
Athugasemdir