Tónlistarkonan Gugga Lísa, eða Guðbjörg Elísa Hafsteinsdóttir, hefur gefið út nýtt og persónulegt lag sem ber titilinn Engillinn minn. Lagið kom út föstudaginn 12. september og er samið í minningu móður hennar, Kristínar Snæfells Arnþórsdóttur, sem lést úr krabbameini árið 2021 eftir stutta og erfiða baráttu.
Gugga segir að lagið sé eitt það persónulegasta sem hún hefur samið:
„Fljúgðu, engillinn minn“ þessi lína kom til mín áður en mamma kvaddi. Það var eins og innsæið vissi áður en raunveruleikinn tók við,“ segir hún
„Restin af laginu varð til í kjölfar fráfallsins sem síðan hjálpaði mér til að takast á við sorgina og að sleppa takinu af móður minni. Tónlist getur verið svo mikill farvegur fyrir bæn, kveðju og lækningu. Það varð lækning í hjartanu sem gaf huggun og von. Ég trúi að margir geti speglað sig í þessu lagi,“ bætir hún við.
Kristín var mikil fyrirmynd í lífi dóttur sinnar og studdi hana alla tíð í tónlistinni. Hún kom meðal annars fram í tónlistarmyndbandi við lagið Lífið er núna, sem tileinkað var baráttu Krafts – félags ungs fólks með krabbamein og aðstandenda. Þar sést Kristín berjast sem hetja á meðan hún háði sína eigin lífsbaráttu. Hún lést skömmu síðar en minning hennar lifir áfram í gegnum tónlist Guggu Lísu.
Nýtt tónlistarmyndband við lagið Engillinn minn hefur einnig litið dagsins ljós og styrkir enn þá persónulegu frásögn sem lagið ber með sér.
Lagið er fyrsta smáskífa af væntanlegri plötu Guggu Lísu, Komi Ríki Þitt, sem kemur út 26. september á Spotify. Platan inniheldur níu frumsamin lög, þar á meðal nokkur í samstarfi við aðra listamenn, og fjallar um mátt Guðs, kærleika, miskunn og náð.
Plötuna verður einnig hægt að nálgast á vínyl og geisladiski í Plötubúðinni, Kirkjuhúsinu, verslun Alda Music og Jata.
Athugasemdir