Eldur Smári Kristinsson, fyrrum formaður og núverandi alþjóðafulltrúi LGB-samtakanna á Íslandi, óskar RÚV, hinsegin fólki og fleirum til hamingju með hryðjuverkaárásina í Ástralíu sem framin var í gær. 15 einstaklingar voru þar myrtir af feðgum en hópur fólks var samankominn til að fagna Hanukkah-hátíðinni.
„Til hamingju RÚV, Páll Óskar og menningarelítan, «hinsegin aðgerðarsinnar» og useful idiots. Orðræðan, dyggðarflöggunin og gyðingahatrið ykkar skilar sér,“ skrifaði Eldur Smári á samfélagsmiðla og birti með mynd þar sem fjallað er um árásina á RÚV.
„Þið eruð vesalingar og aumingjar,“ skrifaði Eldur að lokum.
„Og hversu margir í Efstaleitinu gleðjast yfir þessu?“ spyr svo Hallgeir Jónsson, formaður LGB-samtakanna á Íslandi, í athugasemd við frétt RÚV.
Samtökin, sem áður hétu Samtökin 22, hafa verið harðlega gagnrýnd af mörgum í íslensku samfélagi en þau berjast harkalega gegn réttindum trans fólks á Íslandi. Hafa þau verið kölluð haturssamtök af fólki sem stendur með trans samfélaginu. Anna Kristjánsdóttir, ein fyrsta trans kona Íslands, hefur sagt að það eina sem samtökin hafi á stefnuskrá sinni sé að hatast út í trans fólk en þau segjast hins vegar vera að berjast fyrir réttindum homma og lesbía.
Þá stendur Eldur Smári í málaferlum við RÚV.
Athugasemdir