Hetjan á Bondi-ströndinni í Ástralíu, sem var skotin tvisvar þegar hún reyndi að afvopna einn árásarmannanna, hefur nú verið nafngreind.
Fjölskylda Ahmed al Ahmed, 43 ára, hefur staðfest að hann sé maðurinn sem tókst að stökkva á annan tveggja byssumanna og glíma hann niður, taka af honum vopnið og beina því að honum svo hann hörfaði. Tólf féllu í árásinni, þar af annar skotmannanna.
Ávaxtasölumaðurinn Al Ahmed er múslimskur faðir tveggja barna og hefur enga reynslu af skotvopnum. Hann átti leið hjá Bondi-strönd þegar skothríð hófst.
Ávaxtasölumaðurinn var skotinn tvisvar af hinum grunaða árásarmanni eftir að hann laumaðist að öðrum byssumanninum og náði að afvopna hann.
„Hann er á sjúkrahúsi og við vitum ekki nákvæmlega hvernig ástandið á honum er,“ sagði frændi hans, Mustafa, í samtali við 7News. „Við vonum innilega að hann verði í lagi. Hann er hetja, hundrað prósent. Hann var skotinn einu sinni í handlegginn og aftur í höndina. Ég er enn að bíða eftir að fá að hitta hann.“
Á myndskeiði sem tekið var eftir árásina má sjá Ahmed fá fyrstu hjálp. Hann er með meðvitund og talar við viðbragðsaðila á meðan hlúð er að sárum hans.
Forsætisráðherra Nýja Suður-Wales, Christopher John Minns, sagði á blaðamannafundi að afvopnunin væri „ótrúlegasta atriði sem ég hef nokkru sinni séð“. Bætti hann við „Þessi maður er raunveruleg hetja og ég efast ekki um að fjöldi fólks sé á lífi í kvöld vegna hugrekkis hans. Maður sem gengur að byssumanni sem hafði skotið á almenning og afvopnar hann einn síns liðs, setur eigið líf í hættu til að bjarga ótal öðrum,“ sagði Minns.
Meðal hinna tólf látnu í hryðjuverkaárásinni á Bondi eru rabbíinn Eli Schlanger og Alex Kleytman, eftirlifandi helfararinnar. Að minnsta kosti 29 manns voru fluttir á sjúkrahús með áverka.
Talið er að ísraelskur ríkisborgari hafi verið meðal þeirra sem létust og börn eru á meðal slasaðra en árásin á gyðingahátíðina Chanukah hefur nú verið skilgreind sem hryðjuverk.
Þúsundir manna sáust flýja ströndina í sundfötum og vafðir handklæðum þegar þeir heyrðu skothvellina.
Meðal fórnarlamba var rabbíi sem stýrði fjölskylduviðburði á ströndinni. Einn árásarmannanna lést í árásinni, en annar er í haldi lögreglu. Tveir lögreglumenn slösuðust einnig í árásinni.
Almenningi var ráðlagt að leita skjóls og forðast svæðið á meðan lögregla sinnti aðstæðum. Bondi-strönd er vinsæll áfangastaður jafnt fyrir ferðamenn sem innflytjendur.
Skotárásin átti sér stað á viðburðinum „Chanukah við sjóinn“, sem samtökin Chabad stóðu fyrir. Samtökin staðfestu að eitt fórnarlambanna væri aðstoðarrabbíinn Eli Schlanger.
Í dag markar upphaf átta daga gyðingahátíðarinnar Chanukah, ljóshátíðarinnar.
Forsætisráðherra Ástralíu, Anthony Albanese, sagði á blaðamannafundi að árásin væri „illvirki, gyðingahatur og hryðjuverk“. Bætti síðan við: „Þetta er markviss árás á gyðinga í Ástralíu á fyrsta degi Chanukah, sem ætti að vera dagur gleði og trúarhátíðar. Það er ekkert rúm fyrir hatur, ofbeldi og hryðjuverk í landi okkar. Ég segi það skýrt: við munum uppræta þetta. Í miðri þessari svívirðilegu árás munu Ástralir standa saman í þjóðarlegri samstöðu og sýna gyðingum sem búa hér stuðning á þessum myrka tíma,“ sagði Albanese og bætti við að lögregla og öryggisyfirvöld ynnu að því að kanna hvort fleiri tengdust árásinni.
Fulltrúaráð breskra gyðinga sagði í yfirlýsingu:
„Við erum harmi slegin yfir fregnum af skotárás á Bondi-strönd í Sydney í Ástralíu, þar sem margir létust á gyðinglegum Chanukah-viðburði. Á meðan frekari upplýsingar berast höfum við haft samband við samstarfsaðila okkar í Ástralíu til að lýsa samstöðu okkar og bjóða fram stuðning. Við höfum einnig verið í sambandi við bresk stjórnvöld, sem fylgjast náið með stöðunni. Hryðjuverk og gyðingahatur eru sameiginleg, alþjóðleg ógn sem krefst samstillts og ákveðins viðbragðs.“
Lögreglan í Nýja Suður-Wales sagði í tilkynningu:
„Neyðarþjónusta var kölluð að Campbell Parade klukkan 18:45 á sunnudagskvöldi, 14. desember, eftir tilkynningar um skothríð. Lögreglumenn frá Eastern Suburbs lögregluumdæminu mættu á staðinn ásamt fjölmörgum viðbragðsaðilum. Nokkrir grunsamlegir hlutir á svæðinu eru nú til rannsóknar hjá sérfræðingum og öryggissvæði hefur verið sett upp. Viðbrögð margra stofnana standa enn yfir, umfangsmikið vettvangssvæði hefur verið afmarkað og rannsókn er hafin. Engar tilkynningar hafa borist um önnur tengd atvik í Sydney.“
Keir Starmer, forsætisráðherra Bretlands, sagði að honum væri haldið upplýstum um „afar átakanlega stöðu“ í Sydney. Innanríkisráðherra Bretlands, Shabana Mahmood, sagði að hún myndi ræða málið við ástralskan starfsbróður sinn síðar í dag. Í viðtali við BBC sagði hún:„Ég sá þessar fréttir rétt áður en ég kom í stúdíóið. Ég skil vel kvíða fólks hér heima sem á aðstandendur í Ástralíu, en fyrst og fremst eru hugsanir okkar hjá fórnarlömbunum og áströlsku þjóðinni. Við munum fylgjast grannt með þróun mála og ég mun ræða við ástralska starfsbróður minn síðar í dag.“
Athugasemdir