Hafnfirsk kona hefur stefnt eiginmanni sínum fyrir Héraðsdómi Reykjaness en hún vill skilja við hann.
Í stefnunni segir að hjónin hafi kynntst í lok mars 2024. Í upphafi sambands þeirra lék allt í lyndi en eftir að þau gengu í hjúskap í ágúst 2024 hóf maðurinn að fjarlægjast konuna. Fljótlega læddist þá að konunni sá grunur að eiginmaður hennar hefði einungis gifst henni fyrir hagkvæmni og að um væri að ræða málamyndahjónaband af hans hálfu. Hjónin ræddu skilnað fyrst í upphafi árs 2025 þar sem sundurlyndi hjónabandsins jókst sífellt. Hjónin eiga ekki saman börn og eiga engar sameiginlegar eignir. Konunni er kunnugt um að maðurinn sé enn staddur á Íslandi en telur hann líkast til ekki með dvalarleyfi hérlendis.
Konan fór fram á skilnað hjá embætti sýslumannsins á höfuðborgarsvæðinu í febrúar 2025. Var eiginmaðurinn boðaður til fundar en sinnti ekki mætingum þrátt fyrir fögur fyrirheit. Hafnfirska konan sér ekki fært um að vera lengur í því hjónabandi sem stofnað var til, enda ljóst að sambandi þeirra er lokið og hafa samskipti þeirra engin verið undanfarið. Er henni því nauðsynlegt að höfða mál þar sem hjónin eru ekki sammála um skilnað.
Þá segir einnig í stefnunni að samkvæmt upplýsingum frá Þjóðskrá sé lögheimili eiginmannsins óskráð. Þá er dvalarstaður hans ókunnur og hafa tilraunir til að hafa uppi á honum með öðrum leiðum, svo sem í gegnum síma, tölvupóst og samfélagsmiðla, reynst árangurslausar.
Athugasemdir