Tónlistarmaðurinn Bjartmar Guðlaugsson hlaut heiðursverðlaun tónlistarhátíðarinnar Köld sem fram fór í Neskaupstað um síðustu helgi. Verðlaunin eru veitt þeim sem hafa lagt sérstakt af mörkum til tónlistarlífs á Austurlandi að því er fram kemur í frétt Austurfréttar um málið.
Bjartmar á rætur á Austurlandi en hann bjó á Fáskrúðsfirði til sjö ára aldurs og síðar um árabil á Eiðum. Í gegnum árin hefur hann einnig unnið með tónlistarfólki úr fjórðungnum, meðal annars hljómsveitinni SúEllen og Bjarna Tryggvasyni söngvaskáldi.
Hann er fæddur árið 1952 og hóf tónlistarferil sinn á því að semja lög og texta fyrir aðra flytjendur. Meðal annars samdi hann texta fyrir hljómsveitina Loga úr Vestmannaeyjum á plötu sem kom út árið 1977. Síðar samdi hann lag og texta að laginu „Þannig týnist tíminn“, sem Ragnar Bjarnason og Lay Low gáfu út árið 2012.
Sólóferill Bjartmars hófst árið 1984 þegar hann gaf út sína fyrstu plötu, Ef ég mætti ráða. Síðan þá hefur hann samið fjölda laga sem notið hafa mikilla vinsælda, þar á meðal „Með vottorð í leikfimi“, „Sumarliði er fullur“ og „Týnda kynslóðin“.
Frá árinu 2010 hefur hann komið fram með hljómsveitinni Bergrisanum og ferðast með henni um landið en Bjartmar steig einmitt á svið með sveitinni á tónleikum hátíðarinnar á föstudagskvöld.
Í umsögn hátíðarinnar, sem Jón Björn Hákonarson las upp við afhendingu verðlaunanna, sagði meðal annars: „Við fáum því ekki einungis Bergrisana heldur hinn eina sanna risa í íslensku tónlistarlífi.“
Hér fyrir neðan má hlusta á lag Bjartmars, Kaffi Tröð þar sem hann syngur um að vera einmana og Austfirskur á Kaffi Tröð.
Athugasemdir