Gervigreindarhluti Google, Google DeepMind, hefur fest kaup á minnihlutaeign í íslenska leikjafyrirtækinu CCP Games, sem stendur að tölvuleiknum EVE Online. Frá þessu var greint í vikunni.
Samkvæmt fyrirtækjunum verður leikurinn nýttur til að þjálfa og prófa gervigreindarkerfi DeepMind í sérstöku, lokuðu umhverfi sem verður ekki aðgengilegt almennum spilurum. Markmiðið er að þróa frekar hæfni kerfanna til langtímaáætlunar, aðlögunar og stöðugs náms.
„Þetta er einstakt hermiumhverfi til að prófa almenna gervigreind á öruggan hátt,“ sagði Alexandre Moufarek, rannsóknarstjóri hjá DeepMind.
Leikurinn EVE Online kom fyrst út árið 2003 og hefur um árabil verið þekktur fyrir flókið hagkerfi og stjórnmálakerfi sem mótast að stórum hluta af samskiptum leikmanna sjálfra. DeepMind telur slíkt umhverfi henta vel til þróunar á háþróuðum gervigreindarlíkönum.
Forstjóri DeepMind, Demis Hassabis, sagði tölvuleiki vera „fullkominn æfingavöll fyrir þróun og prófanir á gervigreindarreikniritum“ og að þeir hefðu legið að baki mörgum af helstu tækniframförum fyrirtækisins.
Fjárfestingin er hluti af endurskipulagningu CCP Games, sem hefur verið í eigu suðurkóreska leikjafyrirtækisins Pearl Abyss frá árinu 2018. Eftir viðskiptin, sem nema um 120 milljónum Bandaríkjadala, hefur fyrirtækið tekið upp nafnið Fenris Creations.
Forsvarsmenn fyrirtækisins segja breytingarnar fyrst og fremst snúa að eignarhaldi og stjórnskipulagi og að engar uppsagnir séu fyrirhugaðar á Íslandi. Þá munu starfsstöðvar fyrirtækisins í London og Shanghai halda áfram.
Samkvæmt upplýsingum frá fyrirtækinu nam velta þess á síðasta ári yfir 70 milljónum Bandaríkjadala og reksturinn hafi verið arðbær. Þá eru tvö ný verkefni tengd EVE-heiminum sögð í undirbúningi.
Athugasemdir