Þorvaldur Kristinsson, rithöfundur og fyrrverandi formaður Samtakanna '78, segir orðræðu sem nú beinist gegn trans fólki á Íslandi minna mjög á þá fordóma sem samkynhneigt fólk varð fyrir á níunda áratug síðustu aldar.
Þorvaldur, sem tók virkan þátt í réttindabaráttu hinsegin fólks á fyrstu árum hennar hér á landi, ræðir málið í þættinum Meiningu í umsjón Önnu Gyðu Sigurgísladóttur.
Í þættinum eru meðal annars leikin brot úr útvarpsþætti frá árinu 1983 þar sem hlustendur hringdu inn og lýstu skoðunum sínum á samkynhneigðu fólki. Þorvaldur segir margt í umræðunni í dag minna sig á orðræðu þess tíma.
„Þarna er verið að endurtaka í rauninni allan þann vonda áróður sem ég kynntist fyrir áratugum síðan. Það er sama orðræðan, sömu viðbrögð. Þetta óttablandna hatur við það sem við ekki þekkjum,“ segir Þorvaldur.
Hann segir þó mikilvægan mun vera á stöðunni nú og þá. Trans fólk eigi fjölmarga samherja, bæði innan hinsegin samfélagsins og meðal gagnkynhneigðra.
Þorvaldur telur bakslagið tímabundið en segist hafa áhyggjur af því að orðræðan hafi ratað inn á Alþingi. Hann gagnrýnir sérstaklega þingmenn Miðflokksins og sakar þá um að ýta undir grunsemdir og neikvæða orðræðu í garð trans fólks.
Hann rifjar jafnframt upp umræðuna þegar lög um staðfesta samvist voru samþykkt árið 1996. Þá hafi sambærileg orðræða beinst gegn samkynhneigðum og meðal annars verið tengd barnagiftingum og pedófílíu.
„Það sem er sárast er að horfa upp á það hatur, þann fjandskap og þá heimsku sem beinist að trans fólki á Íslandi,“ segir Þorvaldur.
Athugasemdir