Það verður hægt að gera eitthvað skemmtilegt úr garnafgöngunum sem hafa safnast upp í skúffum og skápum þegar Borgarbókasafnið í Gerðubergi býður upp á ókeypis heklsmiðju í október.
Textílhönnuðurinn Stella Ögmundsdóttir leiðir smiðjuna en hún vinnur nær eingöngu með endurnýtt efni í verkum sínum. Stella útskrifaðist úr textíldeild Myndlistarskólans í Reykjavík árið 2024 og hannar undir nafninu Fözz Studio. Í sköpun hennar fær efniviðurinn gjarnan að ráða ferðinni og gamalt garn og önnur efni fá þannig nýtt líf.
Í smiðjunni geta þátttakendur mætt með alls kyns garnafganga að heiman og lært að hekla einfalda peysu úr því sem annars hefði mögulega legið ónotað áfram í skápnum.
Smiðjan fer fram þrjú miðvikudagskvöld í röð, frá klukkan 18:30 til 20:00, og verður fyrsta kvöldið miðvikudaginn 7. október.
Engin þörf er á að vera flinkur með heklunálina fyrir fram því smiðjan hentar bæði byrjendum og þeim sem hafa meiri reynslu. Þá kostar ekkert að taka þátt.
Smiðjan er hluti af alþjóðlega verkefninu make a thek sem Borgarbókasafnið í Gerðubergi tekur þátt í til þriggja ára.
Þannig gætu nokkrir gleymdir garnafgangar mögulega orðið að nýrri uppáhaldspeysu áður en veturinn skellur á.
Athugasemdir