„Það var ekki edrúkvöld hjá okkur Önnu Kristjáns í gærkvöldi. Mér sýnist Anna vera úrvalsdeildarleikmaður þegar kemur að vínsmökkun meðan ég er eins varamaður í fjórðu deildar liði. En þessi vínsmökkun reyndist hin besta skemmtun enda voru með okkur Önnu nokkur fjöldi af bráðskemmtilegu fólki.“ Þannig hefst Facebook-færsla Brynjars Níelssonar varaþingmanns Sjálfstæðisflokksins, frá því í gær en hún hefur vakið mikla lukku enda Brynjar annálaður húmoristi. Brynjar er nú staddur á Tenerife þar sem þjóðargersemin Anna Kristjánsdóttir býr.

Segist hann hafa daðrað það mikið við Önnu að hún hafi ekki þorað að bjóða sér gistingu.

„Ég daðraði það mikið við Önnu að hún treysti sér ekki til að bjóða mér gistingu eftir að gleðskapnum lauk. Ég þurfti því að ráfa einn heim rammvilltur þar til einhver lögreglumaður stöðvaði mig og kenndi mér á google maps í símanum.“

Brynjar segir ennfremur að lögreglumaðurinn hafi varað hann við jarðskjálftum og mögulegu eldgosi á eyjunni en Brynjar kippti sér lítið upp og gaf honum númerið hjá Víði Reynissyni.

„Hann benti mér jafnframt á að það væru jarðskjálftar á eyjunni og það gæti komið eldgos á hverri stundu. Þegar ég sagði honum að ég væri nú frá Íslandi og alvanur eldgosum spurði hann mig umsvifalaust hvort ég þekkti ekki Víði Reynisson. Ég hélt það nú og hefði setið með honum á þingi fyrir tveim vikum. Hann sagði að hér á Tene væri enginn slíkur almannavarna maður til og úr varð að ég gaf honum símanúmerið hans.“