Lögregla hafði afskipti af fjölda ökumanna víðs vegar um höfuðborgarsvæðið í dag vegna alvarlegra umferðarlagabrota, þar á meðal aksturs undir áhrifum áfengis og fíkniefna, akstursréttindaleysis og annarra brota.
Einn ökumaður handtekinn grunaður um akstur undir áhrifum áfengis og sviptur ökurétti. Í Laugardalnum var annar ökumaður stöðvaður þar sem hann reyndist vera undir áhrifum áfengis og aka ótryggðri bifreið. Sá hinn sami var einnig kærður fyrir að hafa þokuljós bifreiðarinnar tendruð og fyrir að hafa ekki ökuskírteini sitt meðferðis. Skráningarmerki bifreiðarinnar voru fjarlægð á staðnum.
Í miðborginni var ökumaður kærður fyrir notkun farsíma við akstur. Við nánari athugun kom í ljós að hann var undir áhrifum áfengis, þó ekki yfir refsimörkum, og var honum gert að hætta akstri.
Í Hafnarfirði komu upp tvö alvarleg mál. Annars vegar var ökumaður kærður fyrir að aka án þess að hafa öðlast ökuréttindi og hins vegar var annar ökumaður handtekinn vegna gruns um fíkniefnaakstur.
Í Kópavogi var ökumaður handtekinn fyrir akstur undir áhrifum áfengis á ótryggðri bifreið, en skráningarmerki voru einnig fjarlægð í því tilviki. Þá var annar aðili handtekinn fyrir að hlýða ekki fyrirmælum lögreglu og fyrir að beita lögreglumann ofbeldi. Sá var vistaður í fangaklefa.
Tvö umferðarslys urðu í Mosfellsbæ. Í öðru tilvikinu varð minni háttar eignatjón, en í hinu varð meira tjón og þurfti að draga tvær bifreiðar af vettvangi. Einn einstaklingur var fluttur með sjúkraliði á slysadeild.
