Félagið Laxárbakki Resort ehf. hyggst ráðast í umfangsmikla ferðaþjónustuuppbyggingu í Eyja- og Miklaholtshreppur á Snæfellsnesi. Þetta kemur fram í frétt Bændablaðsins.

Samkvæmt fyrirtækjaskrá eru hjónin Ólafur Ólafsson og Ingibjörg Kristjánsdóttir stærstu eigendur félagsins.

Í matsáætlun sem ráðgjafarfyrirtækið Verkís vann fyrir verkefnið kemur fram að fyrirhugað sé að reisa fimm stjörnu hótel í hæsta gæðaflokki með 45 herbergjum. Meðal mannvirkja sem áformað er að byggja eru heilsumiðstöð, veitingastaður, þjónustu- og starfsmannahús auk allt að 19 sjálfstæðra frístundahúsa. Þá er einnig gert ráð fyrir þyrlupalli, þar sem búast má við allt að fimm lendingum á dag. Aðgangur að svæðinu verður fyrst og fremst ætlaður gestum ferðaþjónustunnar.

Jörðin Laxárbakki spannar um 645 hektara landsvæði. Hún afmarkast af Laxá í norðri og Stakkhamarsósi í vestri, sem telst hluti af Löngufjörur. Að austan liggur jörðin að Miklaholti II og Blöndulæk í suðri. Laxárbakki var áður nýttur til landbúnaðar en hefur legið í eyði frá árinu 1947. Áætlað er að framkvæmdir hefjist árið 2027 og fari fram í nokkrum áföngum, þar sem stærsti áfanginn eigi að ljúka árið 2030.

Í matsáætluninni kemur jafnframt fram að framkvæmdasvæðið sé að hluta innan svokallaðs C-hluta náttúruminjaskrár, þar sem finna megi náttúrusvæði sem talin eru verðug friðunar, þar á meðal Löngufjörur. Stór hluti svæðisins fellur einnig innan mikilvægs fuglasvæðis samkvæmt gögnum Náttúrufræðistofnun Íslands, auk þess sem þar er arnaróðal. Framkvæmdaraðili segist þó ætla að leggja áherslu á að mannvirki, vegir og bílastæði samræmist landslagi og náttúru eins vel og kostur er, og að rask á framkvæmdatíma verði haldið í lágmarki. Gert er ráð fyrir að starfsemin geti skapað allt að 300 varanleg störf, en starfsfólk mun að stórum hluta dvelja tímabundið í sérstökum starfsmannahúsum.

Athugasemdafrestur vegna verkefnisins í skipulagsgátt rann út 14. janúar. Í umsögn frá Ungir umhverfissinnar er varað við því að uppbyggingin muni ganga á verðmæt vistkerfi og lífríki. Þar er hvatt til þess að sambærileg ferðaþjónustuverkefni verði fremur staðsett á svæðum þar sem innviðir eru þegar til staðar, í stað þess að raska ósnortnum og alþjóðlega mikilvægum náttúrusvæðum.

Ólafur Ólafsson á jafnframt fleiri jarðir á sunnanverðu Snæfellsnesi, en samkvæmt frétt RÚV frá árinu 2019 á hann einnig Borg, Eiðhús og Miðhraun í grennd við Laxárbakka. Ólafur og Ingibjörg eiga fasteignafélagið Festi, þar sem Ólafur gegnir formennsku í stjórn, auk þess sem þau eiga meirihluta í Samskip og Landflutningum.

Ólafur er einn fjögurra svokallaðra útrásarvíkinga sem dæmdir voru til fangelsisvistar á Kvíabryggju þann 12. febrúar 2012 fyrir efnahagsbrot.