Fjölmiðlamaðurinn Egill Helgason vakti athygli á föstudaginn á auglýsingu um fund sem Félag Sjálfstæðismanna um fullveldismál sem var birt í Morgunblaðinu. „Sjálfstæðisflokkurinn hefur ýmsar vistarverur,“ skrifaði fjölmiðlamaðurinn um auglýsinguna. „Mér finnst stóra spurningin í þessu samhengi vera - hver erum “við”?“ bætti hann svo við í athugasemd.

Á fundinum, sem haldinn var um helgina, töluðu Diljá Mist Einarsdóttir alþingismaður, Helgi Magnús Gunnarsson, fyrrverandi aðstoðarríkissaksóknari og Ólafur Ísleifsson, fyrrverandi alþingismaður, á honum ef marka má auglýsinguna.

Það sem vakti hins vegar kátínu margra í athugasemdakerfi Egils að í auglýsingunni er að finna augljósar villur en sem dæmi vantar N fyrir aftan orðið haldin, september er skrifaður með stóru S og orðið klukkan er skrifuð með þremur K. Þá eru fleiri villur í textanum sem eru þó ekki jafn augljósar.

Fannst nokkrum þetta nokkuð kaldhæðnislegt í ljósi efni fundarins var útlendingamál. Diljá Mist var hins vegar ekki sátt við færslu Egils og tjáði sig í athugasemdakerfinu.

„Ég velti því nú fyrir mér hvort ég ætti að nenna að kommenta, eftir að hafa hlustað á eiganda síðunnar Egill Helgason segja frá því á dögunum að hann líti á hana sem vettvang til að deila eigin skoðunum en gefi umræðunum sem komi í kjölfarið lítinn gaum. Ég var annars beðin um að koma á fund þessa félags til að ræða þingmálin mín sem tengjast útlendingamálum. Hafði ekki séð fyrirsögnina fyrr en í auglýsingu og hún virðist ná tilætluðum árangri að fanga athygli. Spurningin býður upp á ýmiss konar skemmtilega (jafnvel heimspekilega) umræðu sem hefur m.a. vaknað hér á þræðinum um hverjir séu ,,við". Verð þó að segja að það er iðulega hægt að treysta á að á þráðum Egils sé að finna a.m.k. annan enda þessarar umtöluðu skautunar. Okkar allra umburðarlyndasta, víðsýnasta og kærleiksríkasta fólk að dreifa stimplum og upphrópunum og gera fólki upp skoðanir. Hvað ætli orðin nasisti og fasisti komi oft fyrir í umræðum á síðu Egils? Þetta fólk ætti endilega að mæta á sem flesta fundi til að hlusta og taka þátt í yfirveguðum umræðum augnliti til augnlits. Góðar stundir.“