Íslensk lögregluyfirvöld bíða enn eftir svörum frá Dóminíska lýðveldinu um leyfi til að fara út vegna hvarfs Magnúsar Kristins Magnússonar, sem hvarf þar í landi í september 2023.

Sjá einnig: Magnús skilaði sér ekki í flugið frá Dóminíska lýðveldinu: „Farin að óttast mjög um afdrif hans“

Magnús Kristinn, fæddur 1987, fór til Dóminíska lýðveldisins 3. september 2023 og átti bókaðan miða aftur til Íslands 10. september. Hann skilaði sér þó ekki í flugið og hefur ekki spurst til hans síðan.

Sjá einnig: Nærmynd af Magnúsi Kristni: „Mjög venjulegur strákur en fjörugur og uppátækjasamur“

Systir Magnúsar, Rannveig Karlsdóttir sagði í samtali við Mannlíf 7. júní 2024 að lítil hjálp hefði fengist hjá borgaraþjónustu utanríkisráðuneytisins.

„Það eina sem ég held að sé hugsanlega í gangi er að alþjóðadeild lögreglunnar sé að reyna að koma á sambandi við lögregluna úti til að geta farið út og skoðað aðeins málið. Það hefur ekki gengið enn sem komið er. Mér skilst að þessar tilraunir til sambands út hafi staðið síðan fyrir jól, en ekkert gengið.“ Þetta sagði Rannveig þá en enn í dag, 16. apríl 2025 hafa lögregluyfirvöld hér á landi ekki fengið svör frá Dóminíska lýðveldinum um leyfi til að fara út vegna málsins.

„Staðan á málinu sú sama, íslensk lögregluyfirvöld bíða enn svara frá Dóminíska lýðveldinu um leyfi til að fara út vegna málsins.

Dóminíska lýðveldið fer með rannsókn málsins.“ Þannig hljóðaði skriflegt svar lögreglunnar við fyrirspurn Mannlífs um málið.