Charlotte Head, 29 ára breskur aðgerðarsinni og fyrrverandi góðgerðastarfmaður, segist hafa verið meðhöndluð eins og hryðjuverkamaður af breskum yfirvöldum eftir að hún var handtekin vegna mótmælaaðgerða tengdra stuðningi við Palestínu vegna þjóðarmorðs Ísraela. Áður en hún var handtekin starfaði hún við að styðja þolendur heimilisofbeldis og hafði unnið sjálfboðaliðastarf í flóttamannabúðum í Calais.

„Alveg rosalegur hryðjuverkamaður,“ segir hún háðsk í viðtali við Al Jazeera.

Head tilheyrir svokölluðum „Filton 24“, hópi aktívista sem eru sakaðir um að hafa ráðist inn í starfsstöð Elbit Systems UK í Bristol í ágúst 2024. Elbit er dótturfélag stærsta vopnaframleiðanda Ísraels. Í kjölfarið, og eftir önnur tengd atvik, settu bresk stjórnvöld samtökin Palestine Action, sem lýstu ábyrgð á aðgerðunum, á lista yfir hryðjuverkasamtök.

„Við vorum meðal fyrstu aktívista í mjög langan tíma sem voru meðhöndlaðir eins og hryðjuverkamenn,“ segir Head og bætir við að sú flokkun hafi haft afgerandi áhrif á aðstæður hennar í fangelsi.

Hún segir að fjölskylda og vinir hafi lent í miklu skrifræði við að reyna að heimsækja hana og að lesefni hennar hafi verið ritskoðað. Slíkar lýsingar samræmast frásögnum annarra sem tengjast Palestine Action, þótt dómsmálaráðuneytið hafi hafnað ásökunum um mismunun.

Þrátt fyrir að hafa ekki verið sakfelld fyrir neitt brot sat Head í fangelsi í 18 mánuði, langt umfram venjulegt hámark gæsluvarðhalds í Bretlandi. Hún var látin laus gegn tryggingu fyrir þremur vikum. Verjandi hennar líkti henni við súffragettu fyrir dómi.

Eftir lausnina rifjar hún upp andlega erfiðleika fangelsisvistarinnar. Hún var flutt langt frá heimabæ sínum, sem jók einangrunina, og segir að hún hafi á einum tímapunkti reynt að svipta sig lífi.

„Ég var svo þunglynd og svo einangruð og fullkomlega meðvituð um að almenningi væru sagðar lygar um okkur, af lögreglu, hægri pressunni og ríkinu sjálfu, og ég hafði ekkert vald til að hrekja þá frásögn.“

Hún segir tilraunina hafa sprottið af algjöru vanmáttar- og stjórnleysisástandi:

„Ég reyndi að taka mitt eigið líf … eingöngu vegna vanmáttarins sem felst í því að vera notuð sem pólitískt peð og hafa mjög takmarkaða stjórn á eigin lífi.“

Eftir atvikið var hún flutt á sjúkrahús en handjárnuð allan tímann og send aftur í fangelsi daginn eftir. Að hennar mati kallar fangelsiskerfið á „gríðarlegar“ umbætur.

Palestine Action var stofnað árið 2020 og hefur beint aðgerðum sínum að vopnaframleiðendum sem samtökin telja tengjast stríðsglæpum Ísraels. Helsta skotmarkið er Elbit Systems, sem framleiðir meðal annars dróna sem hafa verið notaðir í þjóðarmorðinu á Gaza, þótt breska dótturfélagið neiti því að það útvegi ísraelska hernum vopn.

Head og aðrir aðgerðarsinnar hafa neitað sök í öllum málum. Hún er sögð hafa ekið sendibíl inn á lóð verksmiðjunnar í Bristol til að komast inn.

Þrátt fyrir persónulegar afleiðingar segist hún staðráðin í að halda áfram baráttunni:

„Það er svo sárt að sjá að svo lítið hefur breyst í Palestínu, að þjóðarmorðið hefur haldið áfram óáreitt,“ segir hún. „Þetta er skelfilegt, en staðfestir það sem við höfum lengi vitað: að ríkisvöld eins og Ísrael, Bandaríkin og Bretland ætluðu aldrei að virða alþjóðalög. Þess vegna verðum við að halda áfram að láta í okkur heyra og reyna að koma á raunverulegu réttlæti fyrir Palestínu.“