Í pistli á Vísi í gær lýsir Eva Hauksdóttir, lögmaður, alvarlegu slysi hjólreiðamanns sem féll á hjólastíg þar sem rafskúta hafði verið skilin eftir undir óupplýstum ljósastaur. Maðurinn hlaut lífshættulega áverka og var fluttur á gjörgæslu.

„Sá sem skilur aðskotahlut eftir í myrkri ber ekki ábyrgð á myrkrinu heldur því hvernig hann hegðar sér við þær aðstæður,“ skrifar Eva og spyr hvort rafskútuleigur beri ekki einhverja ábyrgð á hegðun notenda sinna. Hún bendir á að tryggingafélag leigunnar hafi hafnað bótaskyldu og vísað til notendaskilmála, en telur ekki nóg að setja reglur án þess að fylgja þeim eftir.

Hún gagnrýnir jafnframt vinnubrögð lögreglu sem hafi gert það ómögulegt að sækja bætur eða finna þann notanda sem skildi skútuna eftir. „Það er ekki nóg með að eina myndin sem tekin var á staðnum sé tekin úr svo mikilli fjarlægð að það er illmögulegt að sanna frá hvaða leigu rafskútan er, heldur ritaði lögreglan líka nafn rangrar rafskútuleigu í skýrsluna,“ segir hún.

Eva bendir á að rafskútur séu sennilega „hættulegustu farartækin í umferðinni“ og að notendaskilmálar virki ekki sem slysavarnir þegar það hafi engar afleiðingar að brjóta þá. Hún lýsir því hvernig skútur liggi víða á höfuðborgarsvæðinu og valdi bæði slysa- og aðgengishættu.

Þrátt fyrir að rafskútur séu hentugar og vinsælar varar hún við því að slysum muni fjölga nema gripið verði til aðgerða. „Áður en til þess kemur vona ég að þingmenn allra flokka sameinist um það markmið að setja nothæfar reglur um rafskútur og rafskútuleigur. Slysavarnir eru ekki flokkspólitískt mál og þarf ekki einu sinni að deila um þörfina á skýrari reglum,“ skrifar hún að lokum.