Í dagbók lögreglu í nótt er greint frá því að lögreglan hafi þurft að vísa „vanstilltum“ manni af veitingastað í borginni þar sem hann var ölvaður og með vesen.

Þá tilkynnti maður lögreglu að nágranni hans hafi rænt kettinum sínum. Lögregla komst að því að maðurinn hafði ekki prófað að banka upp á hjá nágrannanum til að athuga málið en sá reyndist ekki heima. Lögreglan yfirgaf svæðið stuttu eftir það.

Góðborgari kom á lögreglustöðina með fjármuni sem hann fann á víðavangi og skilaði til lögreglu en ekki er greint frá hversu há fjárhæð um ræðir. Maður var handtekinn grunaður um sölu fíkniefna ásamt skipulagðri brotastarfsemi.

Þá bjargaði lögreglan konu af salerni á djamminu. Reyndist ómögulegt að opna hurðina þar sem hún var svo þung og fékk lögreglan leyfi til að „rjúfa hurðina“ til að frelsa konuna.

Tilkynnt var um mann að ganga berserksgang í íbúð í fjölbýli. Hann var mjög ör og óútreiknanlegur og var hann handtekinn á vettvangi og vistaður í klefa. Í íbúðinni voru talsverð ummerki um fíkniefnaneyslu og skemmdarverk. Þá var tilkynnt um bifreið út af veginum í Heiðmörk. Ökumaður reyndist ölvaður og vímaður og var hann handtekinn og vistaður í klefa.