Vélstjórinn og húmoristinn Anna Kristjáns heiðrar landann með nærveru sinni um hátíðarnar en venjulega býr hún á Tenerife, eins og alþjóð veit. Hún segir frá því í nýjustu dagbókarfærslu sinni á Facebook, hvernig henni tókst að villast í þokunni í Kópavogi.

Anna, sem á afmæli í dag, segir í morgun frá heimsókn sem hún fór í til vinafólks hennar sem býr í Kópavoginum en hún notaði símann til að rata á nýja heimilisfang hjónanna.

Dagur 2331 – Kópavogur.

„Ég skrapp í Kópavoginn í gær að heimsækja vinafólk sem ég hafði ekki hitt í mörg ár. Þau bjuggu í nýju húsi eigi allfjarri Smáralind og ég notaði símann til að leiðbeina mér stystu leiðina til þeirra. Ferðin gekk ljómandi vel og ég fékk bæði kaffi og smákökur og langt og mikið samtal við þau hjónin.“

En svo kom að heimferð og þá fór gamanið að kárna.

„Svo kom að því að kveðja og ég út í bíl og taldi mig þekkja nágrenni Smáralindarinnar til að geta ekið um blindandi þrátt fyrir þokuna sem birgði mér sýn að miklu leyti.

En Kópavogur hefur aldrei verið talinn neitt venjulegur.“

Önnu tókst á einhvern hátt að taka ranga beygju og enda á Reykjanesbrautinni og það í ranga átt.

„Ég fór yfir á ljósum og svo til hægri á næstu ljósum alveg eins og í gamla daga og færði mig svo yfir á vinstri akrein þar sem ég þurfti enn að bíða á ljósum. Þegar greiddist úr umferðinni, hélt ég áfram og áttaði mig þá á að ég væri komin á hraðbrautina, afsakið Reykjanesbrautina áleiðis til Hafnarfjarðar. Helvítis þokan.“

Allt fór þó vel að lokum og komst hún loks á leiðarenda og þakkaði fyrir að einungis ein umferðarljós séu á Suðurhluta Tenerife.

„Ég fann hringtorg uppi á annarri hæð þar sem ég náði að snúa við og halda til norðurs og komst loks alla leiðina í Seljahverfið og allt fór vel að lokum. Ó sú náð að eiga Jesúm með aðeins ein umferðarljós á suðurhluta Tenerife.

Helvítis nagladekkin. Afsakið, það eru víst engin nagladekk undir bílnum, en heim komst ég þó.“