Enn og aftur sendir lögreglan á höfuðborgarsvæðinu tilkynningu á fjölmiðla þar sem hún segir frá því að þremur erlendum ríkisborgurum hafi verið vísað á brott frá Íslandi.

Í tilkynningunni kemur fram að þremur erlendum ríkisborgurum, tveimur körlum og einni konu, hafi verið vísað brott frá Íslandi samkvæmt ákvörðun Útlendingastofnunar á grundvelli 1., sbr. 2. mgr. 95. gr. laga um útlendinga nr. 80/2016.

Samkvæmt lögreglunni er fólkið á þrítugs- og fertugsaldri og er talið tengjast skipulagðri brotastarfsemi, en það var handtekið 18. desember vegna þjófnaðarmála á höfuðborgarsvæðinu og sat í gæsluvarðhaldi frá 19. desember þar til það var sent úr landi fyrir áramótin. Fólkinu var jafnframt bönnuð endurkoma til Íslands í fimm ár.