Jón Hólmgeirsson er látinn en hann var á 91 aldursári.
Jón Hólmgeirsson fæddist 15. apríl 1935 í Stafni í Reykjadal og lést á Sjúkrahúsinu á Akureyri 3. apríl síðastliðinn, samkvæmt Akureyri.net.
Foreldrar hans voru Kristín Þorvaldsdóttir húsfreyja (1902–1985) og Hólmgeir Sigurgeirsson bóndi á Völlum í Reykjadal (1909–1984).
Jón ólst upp á Völlum í Reykjadal þar sem faðir hans stundaði búskap. Hann átti þar æsku sem einkenndist af frelsi og útiveru, en fjölskylda hans á rætur að rekja til Stafnshverfis þar sem búskapur hefur verið stundaður í ættinni um aldir. Hestamennska var stór hluti af uppvextinum og hélt sá áhugi áfram eftir að hann flutti til Akureyrar, þar sem fjölskyldan hafði aðstöðu fyrir hesta.
Systkini Jóns eru Hólmfríður, fædd 1932, og Sigurgeir (1939–2024).
Hann stundaði nám í barnaskóla í Stafni og síðar á Laugum í Reykjadal. Árið 1957 flutti hann til Akureyrar, hóf nám í Iðnskólanum og lauk sveinsprófi í húsgagnasmíði árið 1962. Samhliða námi starfaði hann á Húsgagnaverkstæði Ólafs Ágústssonar. Árið 1963 stofnaði hann eigið smíðaverkstæði, Fjarkann, en síðar færði hann starfsemina heim í bílskúr að Álfabyggð.
Jón starfaði einnig við kennslu, meðal annars í Oddeyrarskóla og Glerárskóla. Kennslan átti vel við hann og því hóf hann kennaranám 46 ára að aldri og lauk kennsluréttindum frá Kennaraskólanum árið 1982. Hann kenndi síðan við Gagnfræðaskóla og síðar Verkmenntaskólann á Akureyri fram til starfsloka, 67 ára gamall.
Á Akureyri kynntist Jón eiginkonu sinni, Sigrúnu Kristínu Kristjánsdóttur (1937–1988), og gengu þau í hjónaband 22. desember 1958. Þau eignuðust þrjú börn: Kristján Ingvar, Þorbjörgu Kristínu og Hólmgeir.
Fjölskyldan bjó fyrst í Strandgötu 35 en flutti árið 1966 í Álfabyggð í hús sem Jón byggði sjálfur og þar bjó hann alla tíð síðan.
Jón hafði mikinn áhuga á tréútskurði og kenndi þá list í áratugi, bæði í skólum og í félagsstarfi eldri borgara. Hann var einnig virkur í kórstarfi, meðal annars með Karlakór Akureyrar í yfir 25 ár og síðar með kirkjukórum í Eyjafirði. Á efri árum tók hann virkan þátt í starfi Félags eldri borgara á Akureyri.
Jón hélt góðri heilsu og andlegri skerpu fram á síðasta dag að því er fram kemur í minningargrein á Akureyri.net.
Eftirlifandi sambýliskona hans er Ada Elísabet Benjamínsdóttir, fædd 1936.
Að ósk hins látna fer útför hans fram í kyrrþey.
