Matvælastofnun varar við neyslu á einni framleiðslulotu af Golden Lion-black garlic singel cloves sem Dai Phat ehf. flytur inn en þetta kemur fram í tilkynningu frá MAST.

Fyrirtækið hefur í samráði við Heilbrigðiseftirlit Reykjavíkur stöðvað sölu og innkallað vöruna. Ástæða innköllunar er vegna þess að það greindist í vörunni ólöglegt varnarefni ethýlen oxíð sem er bannað að nota í matvæli.

Tilkynningin barst til Íslands í gegnum RASFF evrópska hraðviðvörunarkerfið um hættuleg matvæli og fóður.

Viðskiptavinum er bent á að neyta ekki vörunnar heldur farga henni eða skila í verslun þar sem hún var keypt.