Matvöruverð á Íslandi heldur áfram að hækka og hefur hækkað hraðar á fyrstu mánuðum ársins en á sama tíma í fyrra, samkvæmt nýrri samantekt Verðlagseftirlits ASÍ.

Vörukarfa ASÍ hækkaði um 0,68 prósent milli febrúar og mars og nemur uppsöfnuð hækkun á árinu nú tæpum tveimur prósentum.

Hækkanirnar ná til flestra vöruflokka, en mest hækkun mælist á unnum kjöt- og mjólkurvörum. Þá hafa sælgæti og aðrar dýraafurðir einnig hækkað í verði. Á móti hefur verð á sumum ávöxtum og grænmeti lækkað, þar á meðal appelsínum, sveppum, rótargrænmeti og lauk.

Mismunandi þróun milli verslana

Mest hefur matvöruverð hækkað það sem af er ári í Fjarðarkaupum, eða um 3 prósent, í Nettó um 2,3 prósent og í Bónus um 2 prósent. Athygli er vakin á því að tölur fyrir Fjarðarkaup í mars liggja ekki fyrir og er því miðað við febrúargögn.

Í Krambúðinni hefur verð hins vegar lækkað um 2,4 prósent það sem af er ári.

Mesta hækkun milli mánaða mældist í Extra, þar sem verð hækkaði um 7,6 prósent. Sú hækkun skýrist þó að hluta af verulegri verðlækkun í versluninni mánuðinn áður. Þar á eftir komu Krambúðin með 1,4 prósenta hækkun og Nettó með 1,3 prósent. Minnstar hækkanir voru í Krónunni og Prís, um 0,3 prósent.

Prís áfram ódýrust

Samkvæmt mælikvarða Verðlagseftirlits ASÍ er Prís áfram ódýrasta verslunin, þar sem verð er að meðaltali aðeins 0,05 prósent yfir lægsta verði sömu vöru.

Næst á eftir koma Bónus og Krónan. Munur á verði er hins vegar verulegur þegar kemur að dýrari verslunum, þar sem vörur í 10-11 eru að jafnaði nær 72 prósentum dýrari en ódýrasti kosturinn.

ASÍ bendir á að niðurstöðurnar beri að skoða með fyrirvara þar sem ekki tókst að safna gögnum úr Fjarðarkaupum fyrir marsmánuð.