Lögreglan á höfuðborgarsvæðinu hafði í nógu að snúast frá klukkan 17:00 síðdegis til klukkan 05:00 í nótt, samkvæmt dagbók embættisins.
Meðal atvika var að einstaklingur var handtekinn eftir að hafa verið í tökum dyravarða í miðbænum. Honum var ekið á lögreglustöð, en ekki tókst að eiga við hann samskipti og var hann vistaður vegna ástands síns.
Þá var annar aðili stöðvaður í akstri og grunaður um sölu og dreifingu fíkniefna. Sá var færður í fangageymslu í þágu rannsóknar málsins. Í öðru tilviki voru tveir einstaklingar handteknir í miðbænum, einnig grunaðir um fíkniefnasölu. Við handtöku fundust fíkniefni og fjármunir á þeim, auk frekari efna við leit á lögreglustöð. Báðir voru vistaðir vegna rannsóknar.
Lögregla var einnig kölluð til vegna manns sem olli usla utan við skemmtistað í miðbænum. Þegar lögreglu bar að garði var maðurinn enn til vandræða og var því handtekinn. Ekki tókst að ræða við hann og var hann vistaður vegna ástands.
Í öðru máli var maður handtekinn utan við starfsmannasamkomu fyrirtækis eftir að tilkynning barst um framferði hans. Hann neitaði að gefa upp nafn sitt við afskipti lögreglu og var því fluttur á stöð. Þar var honum tjáð að honum yrði sleppt ef hann veitti persónuupplýsingar, en hann neitaði áfram og var jafnframt mjög ölvaður. Var hann því vistaður.
Fimm einstaklingar voru handteknir grunaðir um akstur undir áhrifum áfengis og fíkniefna. Allir nema einn voru látnir lausir eftir sýnatöku, en sá var vistaður vegna málsins.
Þá var ökumaður stöðvaður við akstur án ökuréttinda, en því máli lauk með vettvangsskýrslu. Einnig var lögregla kölluð til vegna umferðaróhapps þar sem bifreið hafði verið ekið á skilti. Engin slys urðu á fólki en bifreiðin skemmdist töluvert.
