Rapparinn, grínistinn og skáldið Halldór Halldórsson, betur þekktur sem Dóri DNA, greindi frá því í hlaðvarpsþættinum Betri en flestir að hann hafi lent í lífsháska í flugi fyrir stuttu síðan en grínistinn var að koma til baka frá Ibiza þar sem hann var að taka upp nýja seríu af þættinum Ein Stjarna.
Rétt er þó að taka fram að Dóri var mjög gáskafullur þegar hann sagði söguna.
„Við þurfum að þakka Guði að ég sé með ykkur í dag. Ég lenti í flugháska í gær, alvöru flugháska. Við þurftum að fljúga rrrrrrrrrrrosalega kenjótta leið heim. Ég veit ekki hvort þið vissuð það en Play féll, WOW féll og allt þetta og það er ekkert svo mikið af flugmiðum í boði. Ekki að það, ég gjörsamlega elska Icelandair, það er uppáhaldsflugfélagið mitt í heiminum en mér brá allavega. Núna er seasonið að detta inn og þá fara að dælast út miðlar en við þurftum allavega að fljúga apakattaleið heim. Við þurftum að fljúga Ibiza-Barcelona, Barcelona-Búdapest. Búdapest. Í Ungverjalandi. Og þar, strákar, þar var ég næstum því dauður,“ segir Dóri í þættinum.
„Það eru einhverjir flugmenn búnir að reyna gera lítið úr þessu en þessir menn, þeir vita ekki að við vorum að lenda í Búdapest, gott veður, og allt í einu rétt í lendingu fer hún að vagga svona og maður er bara „bíddu what“ og lagar sig, fannst eins og hún sé að lenda og hún er bara að snerta jörðina. Upp aftur. Tökukrúið og ég og Steindi var dreift um alla vél þannig að ég var einn þarna að skíta í mig úr hræðslu með einhverjum indónesískum manni,“ en samkvæmt Dóra var hann um borð í vél Wizz Air þegar atvikið átti sér stað.
Á endanum lenti vélin samt örugglega á flugvellinum án frekari vandræða.
Mörg mismunandi umræðuefni voru tekin fyrir í þættinum, þar á meðal Húrra Reykjavík, Borgarlínan, Björgvin Halldórsson og Keflavíkurflugvöllur.
