Egypska sjónvarpsstjarnan Sarah Khalifa hefur verið dæmd til dauða með hengingu fyrir aðild að umfangsmikilli fíkniefnastarfsemi í Egyptalandi.

Khalifa, sem er 39 ára og fyrrverandi stjórnandi egypska glæpaþáttarins Mission Impossible, brast í grát þegar dómurinn var kveðinn upp í Kaíró. Alls voru hún og ellefu aðrir sakborningar dæmd til dauða.

Saksóknarar sökuðu hópinn um að hafa flutt inn hráefni til framleiðslu á tilbúnum fíkniefnum og geymt fullunnin fíkniefni í íbúðarhúsnæði.

Khalifa hefur neitað sök og samkvæmt fjölmiðlum sagðist hún við rannsókn málsins aldrei hafa reykt sígarettu. Hún mun jafnframt hafa sagt fyrir dómi að hún hefði enga þörf fyrir að afla sér tekna með fíkniefnasölu.

Alls voru 28 ákærðir í málinu. Yfirvöld lögðu hald á meira en rúmlega 725 kíló af fíkniefnum auk óskráðra skotvopna og skotfæra.

Níu sakborningar til viðbótar voru dæmdir í lífstíðarfangelsi en sjö voru sýknaðir.

Khalifa, sem einnig rak lýtalækningastofu og fyrirtæki í viðburðahaldi, var handtekin árið 2025. Dómurinn var kveðinn upp eftir að leitað hafði verið álits stórmúftans í Egyptalandi, eins og áskilið er í dauðarefsingarmálum þar í landi.

Hægt er að áfrýja dómnum en ekki liggur fyrir hvort það verður gert.