Ákvörðun stjórnenda Eiffel-turnsins í París, um að verða við ósk indversks trúfélags og halda kvenkyns starfsmönnum til hlés, hefur vakið hörð viðbrögð og mikla reiði í Frakklandi. Konunum var gert að vera eins lítið áberandi og mögulegt var á meðan leiðtogi félagsins heimsótti turninn á laugardag. Vegna málsins var turninum lokað í gær á meðan stjórnendur funduðu með starfsfólki.

Heimsókn Mahant Swami Maharaj, leiðtoga hindúatrúfélagsins BAPS (Bochasanwasi Akshar Purushottam Swaminarayan Sanstha), dró dilk á eftir sér þegar í ljós kom að stjórnendur mannvirkisins höfðu skipað kvenkyns starfsmönnum að yfirgefa vinnusvæði sín eða fara afsíðis. Í sumum tilfellum voru karlmenn fengnir til að ganga í störf kvennanna á meðan heimsókninni stóð, svo trúarleiðtoginn þyrfti sem minnst að umgangast konur.

Harðar deilur og lokun turnsins

Starfsmannafélag Eiffel-turnsins fordæmdi ákvörðunina harðlega og lýsti yfir hneykslun á því að konum hefði verið vikið til hliðar og þær gerðar ósýnilegar vegna kyns síns. Mótmæli starfsfólks leiddu til þess að turninum var lokað í heilan dag á meðan stjórnendur ræddu við starfsfólk, en hann var opnaður á nýjan leik í morgun.

Franskir stjórnmálamenn hafa stigið fram og fordæmt atvikið einum rómi. Aurore Berge, jafnréttisráðherra Frakklands, sagði málið forkastanlegt og benti á að í Frakklandi væri engin hefð fyrir því að skipa konum að vera ósýnilegar.

Biðjast afsökunar á mistökunum

Trúfélagið BAPS, sem hefur náin tengsl við Narendra Modi, forsætisráðherra Indlands, hefur sent frá sér afsökunarbeiðni vegna þeirra óþæginda og sársauka sem málið hefur valdið.

Stjórnendur Eiffel-turnsins hafa sömuleiðis beðist opinberlega afsökunar á atvikinu og viðurkenna að það hafi verið alvarleg mistök að verða við beiðni trúfélagsins.