Þurr húð getur verið mikill höfuðverkur þegar kemur að förðun, sérstaklega á köldum vetrarmánuðum þegar nístandi vindur og innihitun ræna húðina sínum náttúrulegu olíum.

Margir upplifa að farðinn verði kökukenndur, flagni eða setjist í fínar línur. Samkvæmt förðunarfræðingnum Saba Khan snýst listin að baki förðun fyrir þurra húð ekki um flókna tækni, heldur um réttan undirbúning og skynsamlegt vöruval.

Í samtali við Vogue bendir Khan á að algengustu mistökin sem fólk með þurra húð gerir séu að flýta sér um of í húðumhirðunni, setja of mikið magn af vörum á þurr svæði og sleppa því að hlúa að húðinnni reglulega með mildum hætti.

„Fyrir mér snýst undirbúningurinn um að vörurnar drekki sig inn í húðina frekar en að hlaða of mörgum lögum ofan á hana. Farði situr alltaf betur á húð sem er vel nærð en ekki á húð sem er með of margar vörur eða of sleip,“ segir Khan.

Hún mælir með því að fólk fjárfesti í vörum sem brúa bilið á milli húðumhirðu og förðunar (e. skincare-makeup hybrids). Í stað þungra, matta farða mælir hún með léttari serum-vörum og kremaðri áferð sem bráðnar inn í húðina.

Meðal þeirra vara sem Khan telur ómissandi í snyrtitöskuna fyrir þurra húð eru:

• Rakaríkur undirbúningur: haruharu wonder Black Rice Hyaluronic Toner sem gefur léttan raka og Augustinus Bader The Rich Cream sem nærir húðina djúpt án þess að skilja eftir olíufilmu.
• Farðinn sem breytir leiknum: Milk Makeup Hydro Grip Gel Tint, en sú vara er hlaðin hýalúrónsýru og eykur raka húðarinnar um 24 prósent samkvæmt rannsóknum. Khan notar þennan létta lit á nánast alla sína viðskiptavini, stundum einan og sér eða blandaðan saman við þyngri farða.
• Kremaður ljómi: Í stað púðurvara mælir hún með kremuðum kinnalitum og skyggingastiftum, eins og frá Saie Beauty og Westman Atelier, en þeir innihalda nærandi olíur sem líkja eftir náttúrulegri áferð húðarinnar.

Þá minnir Khan á að jafnvel fólk með þurra húð þurfi stundum að nota púður til að festa farðann, en lykillinn sé að velja vörur eins og BY TERRY Hyaluronic Hydra-Powder, sem inniheldur hýalúrónsýru og dregur úr glans án þess að þurrka húðina upp eða gera hana matta.

Að lokum bendir hún á að áhöldin skipti máli: best sé að nota fingurna til að fá ferskan og náttúrulegan hversdagsljóma, en nota raka förðunarsvampa ef stefnt er að meiri fínpússun.