Áslaug Arna Sigurbjörnsdóttir, fyrrverandi ráðherra og þingmaður Sjálfstæðisflokksins, hefur sett íbúð sína á Hafnartorgi í Reykjavík á leigu vegna flutninga til Lundúna. Þar hefur hún tekið til starfa hjá Fenris Creations.

Miklar breytingar hafa orðið á högum Áslaugar síðustu tvö ár. Hún laut í lægra haldi fyrir Guðrúnu Hafsteinsdóttur í formannskjöri Sjálfstæðisflokksins í febrúar 2025 og hélt síðar til náms við Columbia-háskóla í New York. Hún sneri aftur til Íslands síðasta sumar og lét í kjölfarið af þingmennsku.

Áslaug greindi frá því á Instagram að heimili hennar síðustu sjö ár væri nú laust til leigu. Líklegt er að Áslaug muni fá ágætis pening í leigu enda mjög eftirsótt svæði til að búa á. Hún óskaði eftir ábendingum um fólk í leit að íbúð í miðborg Reykjavíkur.

Íbúðin er á fimmtu hæð og með svölum. Þar eru tvö svefnherbergi og tvö baðherbergi. Af myndum að dæma er íbúðin glæsilega innréttuð, með rúmgóðu eldhúsi, stórri eyju og fjölmörgum listaverkum á veggjum.