Franski framleiðandinn BIC hyggst sækja af auknum krafti inn á markað fyrir kannabisneytendur í Bandaríkjunum í þeirri von að auka sölu á kveikjurum fyrirtækisins. BIC er þekktast fyrir einnota penna, rakvélar og kveikjara.
Fyrirtækið hefur meðal annars endurvakið auglýsingaslagorðið „Flick my Bic“, sem naut mikilla vinsælda á áttunda áratug síðustu aldar. Markmiðið er að höfða sérstaklega til ört stækkandi hóps bandarískra kannabisneytenda.
Rob Versloot, forstjóri BIC, segir þróunina í Bandaríkjunum hafa verið hraða. Þótt kannabis sé enn ólöglegt samkvæmt alríkislögum hafa flest ríki Bandaríkjanna heimilað notkun þess í lækningaskyni og rúmlega 20 ríki hafa lögleitt neyslu í afþreyingarskyni.
Versloot, sem er frá Amsterdam, telur veruleg sóknarfæri felast í þessari þróun. Hann tók við stjórn BIC fyrir rúmu ári og hefur það hlutverk að snúa við rekstri fyrirtækisins eftir nokkur ár þar sem sala hefur verið undir væntingum.
Minnkandi tóbaksneysla hefur meðal annars haft áhrif á eftirspurn eftir kveikjurum. BIC hefur því reynt að höfða til nýrra viðskiptavina og fengið þekkta kannabisneytendur á borð við tónlistarmennina Willie Nelson og Snoop Dogg, auk sjónvarpsstjörnunnar Mörthu Stewart, til að koma fram í auglýsingum fyrir kveikjara.
BIC hefur hingað til lagt mikla áherslu á sölu í stórum matvöru- og verslunarkeðjum í Bandaríkjunum. Stjórnendur sjá nú tækifæri í 15 til 20 þúsund sérverslunum sem selja vörur tengdar reykingum og kannabisneyslu.
Kveikjarar skiluðu um þriðjungi af heildarsölu BIC á fyrri helmingi ársins. Heildarsala fyrirtækisins dróst þó saman um 3,5 prósent og nam rúmum einum milljarði evra.
