Leikkonan Salma Hayek fagnaði stórafmæli á dögunum þegar hún gekk í raðir sextugra. Í tilefni dagsins deildi hún djarfri nektarmynd á Instagram þar sem hún syndir nakin í sjónum og skrifaði einfaldlega: „60 og þakklát.“ Myndirnar vöktu gríðarlega athygli og rigndi hamingjuóskum yfir stjörnuna frá aðdáendum og samstarfsfólki í Hollywood, þar á meðal frá París Hilton, Lindsay Lohan og Vanessu Hudgens.
Hayek, sem var ein helsta kyntákn tíunda áratugarins eftir leik sinn í myndum á borð við Dogma og From Dusk Till Dawn, þykir halda ótrúlegum æskuljóma. Hún prýddi meðal annars forsíðu sundfatablaðsins Sports Illustrated á síðasta ári.
Margir velta fyrir sér hvernig leikkonunni tekst að halda velli og hefur hún verið einstaklega opin með sínar aðferðir í gegnum árin. Hér eru helstu leyndarmálin á bak við útlit og heilsu stjörnunnar:
Hafnar Botoxi en treystir á tæknina
Þegar kemur að andlitslyftingum og húðvörum fer Hayek óhefðbundnar leiðir miðað við margar stjörnur í Hollywood. Hún fullyrðir að hún noti hvorki Botox, fylliefni né öflugar húðflögunaraðferðir (chemical peels). Þess í stað treystir hún á nútímatækni og notar reglulega útvarpsbylgju- og örtíðnitæki til þess að stinna húðina og draga úr hrukkum.
Þá dásamar hún náttúrulega mexíkóska barkarþykknið Tepezcohuite. Þetta efni er jafnan notað í heimalandi hennar til að meðhöndla brunasár en Hayek fullyrðir að það endurnýi húðina með ótrúlegum hætti.
Enginn tími fyrir ræktina – Dansar á hlaupabrettinu
Hayek viðurkennir fúslega að hún hafi ekki agann í að mæta í ræktina á hverjum morgni, enda vinnudagarnir oft allt að tuttugu tímar. Leyndarmál hennar liggur í líkamsstöðunni. Hún vinnur með sérfræðingi í London sem kenndi henni að halda líkamanum þannig að vöðvarnir séu virkir allan daginn – jafnvel á meðan hún burstar tennurnar.
Hún stundar einnig svokallað endurheimtandi jóga (restorative yoga) þar sem áherslan er á að tóna vöðvana án þess að spenna þá. Þegar hún notar hlaupabretti fer hún heldur ekki hefðbundnar leiðir; í stað þess að hlaupa kýs hún að dansa á brettinu.
Nudd er leynivopnið og engir megrunarkúrar
Til að halda vöðvunum stinnum og heilbrigðum treystir Hayek blindandi á nudd. Leynivopnið hennar er nuddari sem býr í Japan en heimsækir London reglulega. Hayek segir að nuddið súrefnisvæði húðina, örvi blóðrásina og vinni kraftaverk á sogæfakerfi andlitsins.
Að lokum segist leikkonan ekki neita sér um neitt þegar kemur að mat. „Ég er ekki hrifin af megrunarkúrum og ég er hreinlega ekkert góð í þeim,“ segir afmælisbarnið hressa að lokum.
